|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 286 Hüküm no: 300 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed b. Mustafa’nın, Ali b. Mustafa’da emanet bir bıçağı olduğuna dair iddiasını ispat edemediği
Yemîn Mahmiye-i İstanbul hısnı ebvâbından Bahçekapısı dâhilinde sâkin İmad Ağa etbâ‘ından Ahmed b. Mustafa nâm kimesne meclis-i şer‘-i şerîf-i lâzımü’t-teşrîfde, işbu bâ‘isü’l-kitâb Ali b. Mustafa mahzarında üzerine da‘vâ ve takrîr-i kelâm edip bundan akdem mezbûr Ali yedinde on guruş kıymetli bir bıçağımı alâ tarîki’l-vedî‘a emânet vaz‘ ve teslîm ol dahi yedimden ahz u kabz ve tesellüm eyledikden sonra hâlâ mezbûr bıçağı mezbûr Ali’den taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr, müdde‘î-i mezbûr Ahmed’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûr Ahmed yedinden alâ tarîki’l-vedî‘a on guruş kıymetli bir bıç ağını almadığına mezbûr Ali’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin müdde‘î-i mezbûr Ahmed mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâlis aşer min Zilka‘de 1073.
Şuhûdü’l-hâl: Mehmed Çelebi b. Abdullah, Resûl b. Rıdvan, Mahmud b. Veli, Mehmed b. Ramazan, Mehmed b. Süleyman.
|