.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 287
Hüküm no: 301
Orijinal metin no: [26b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Osman Çelebi b. Mustafa’nın mülkünü Fâtıma bt. Hüseyin’e sattığı

Mülknâme Mahmiye-i İstanbul[’da] Akşemseddin mahallesinde sâkin Osman Çelebi b. Mustafa nâm kimesne mahfil-i kazâda, işbu bâ‘isetü’l-vesîka Fâtıma bt. Hasan nâm hâtun mahzarında ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafı Mehmed Efendi mülkü ve bir tarafı Ali nâm kimesne mülkü ve iki tarafı tarîk-i âm ile mahdûd iki bâb fevkānî ve iki bâb tahtânî odalar ve iki kenîf ve ahır ve zât-ı eşcâr-ı müsmire ve gayrı müsmire bahçeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık otuz beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūme Fâtıma Hâtun’a bey‘ ve teslîm ol dahi vech-i muharrer üzre iştirâ ve kabûl ve tesellüm eyledikden sonra semeni olan meblağ-ı mezbûru müşteriye-i mezbûre Fâtıma Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezbûr müşteriye-i merkūme Fâtıma Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Mehmed Efendi el-İmâm, Halil Çelebi el-Müezzin, üstâd Mehmed b. Derviş, Abdülkādir b. Mehmed, Hasan Beşe b. Ali, Seyyid Mehmed b. Seyyid Hoca, Hasan Çelebi el-Yesâri, Hasan Çelebi b. Mehmed.