|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 287 Hüküm no: 302 Orijinal metin no: [26b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İstemad v. Dimo ve kardeşi Todori’nin sürsat ve nüzül bedelinden borçlarını Dimo v. Dero’ya ödedikleri
İbrâ Vilâyet-i Rumeli’nde Ergiri kazâsına tâbi‘ Garbeş nâm karye ahâlîsinden İstemad v. Dimo nâm zimmî kendi tarafından asâleten ve karındaşı Todori v. Dimo tarafından sâbitü’l-vekâle vekîl olmağla vekâleten meclis-i şer‘-i hatîrde karye-i mezbûre ahâlîsinden Dimo v. Dero nâm zimmî muvâcehesinde takrîr-i kelâm ve bast-ı merâm edip bin altmış dokuz senesinde kazâ-i mezbûre ahâlîsinden cem‘ ve tahsîli fermân olunan bedel-i nüzül ve sürsat malından karyemiz ahâlîsine tevzî‘ olunan on üç bin yüz akçeden karındaşım mezbûr Todori ile benim üzerimize lâzım gelen bin yüz akçe ki cem‘an iki bin iki yüz akçeyi emrimiz ile mezbûr Dimo mâl-ı merkūmu cem‘ ve kabza me’mûr olan Osman Ağa’ya teslîm etmişdir hâlâ biz dahi meblağ-ı mezbûr iki bin iki yüz akçeyi mezbûr Dimo’ya tamâmen edâ ve teslîm etmeğin mezbûr Dimo’dan suâl olunup takrîri tahrîr ve sûreti yedimize verilmek matlûbumuzdur dedikde gıbbe’s-suâl mezbûr Dimo cevâbında fi’l-vâki‘ mezbûr için merkūm Osman Ağa’ya teslîm eylediğim meblağ-ı mezkûr iki bin iki yüz akçeyi mezbûrân İstemad ve Todori yedlerinden tamâmen alıp kabz edip meblağ-ı merkūmdan yedlerinde bir akçe bâkī kalmadı dedikde mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene 1073.
Şuhûdü’l-hâl: Mustafa Çavuş b. Abdullah el-Mübâşir, Mahmud b. Mustafa, Şükrullah Çelebi b. Mustafa, Abdi Çelebi b. Hüseyin.
|