.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 288
Hüküm no: 303
Orijinal metin no: [26b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mumcu Apostol v. Avram’ın ürettiği mumların Yenicami civarında kendi tasarrufunda olan iki adet dükkana tahsis olunduğu

Ta‘yîn-i selhhâne Mahmiye-i İstanbul’da mumcular tâifesinin kethüdâları Ömer Bey b. Abdullah ve Yiğidbaşıları Dimo nâm zimmî ve tâife-i mezbûreden Niko v. Yako ve Dizo v. Paroş ve Ziro v. Dimo ve sâirleri meclis-i şer‘-i şerîf-i şâmihu’l-imâd ve mahfil-i münîf-i râsihu’l-evtâdda her biri takrîr-i kelâm ve bast-ı merâm edip [26(2)-a] mahmiye-i mezbûrede Balıkpazarı kurbunda vâki‘ Arpa Anbarı’na muttasıl olup sâbıkan Şam-ı cennet-meşâm kadısı olan üsvetü’l-ulemâ’i’l-izâm merhûm Ebûsaid Efendi hazretlerinin mahdûm-ı âlîleri Ahmed Efendi hazretlerinin mumhânesine mutasarrıf olan işbu hâzır bi’l-meclis Apostol v. Avram nâm zimmî, zikr olunan mumhânenin mumunu eyyâm-ı sayf ve şitâda yine Balıkpazarı kurbunda Yeni câmi‘-i şerîf civârında tasarrufunda olan iki bâb bakkal dükkânına verip âhar mumhâneden müdâhale olunmayıp, kadîmden mahmiye-i mezbûrede olan mumhânelerin her biri bakkal dükkânlarına mu‘ayyenden mezbûr Apostol tasarrufunda olan mumhâne dahi zikr olunan iki bakkal dükkânına ta‘yîn ve tahsîs olunup bu minvâl üzre kavl ve ittifâk etmişizdir, cânib-i şer‘den ittifâkımız ketb ve tahrîr olunup sûreti yedimize def‘ ve teslîm olunmak matlûbumuzdur dediklerinde, mes’ûllerine muvâfakat birle işbu hurûf li ecli’t-temessük bi’t-taleb ketb ve yed-i tâlibe def‘ olundu. Fi’l-yevmi’l-hâdî aşer min Şevvâli’l-mükerrem li sene 1073.


Şuhûdü’l-hâl: El-Hâc Ahmed b. Mahmud, Ahmed Çelebi b. Ali, ed-dâ‘î Şükrullah b. Mustafa, Abdi Çelebi b. Hüseyin.