İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 517 Hüküm no: 655 Orijinal metin no: [58b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüseyin’in Eman v. Hüdâverdi aleyhine açtığı alacak davasında iddiasını ispat edemediği Men‘ Rumeli’nde Varat kal‘asında vefât eden Receb Beşe b. Hüseyin’in verâseti, li ebeveyn karındaşları Mustafa ve Mehmed’e münhasıra olduğu şer‘an zâhir ve müte‘ayyin oldukdan sonra mezbûr Mustafa mahfil-i kazâda işbu bâ‘isü’s-sifr Eman v. Hüdâverdi nâm Ermeni muvâcehesinde üzerine da‘vâ ve takrîr-i kelâm edip müteveffâ-yı merkūm hâl-i hayâtında mezbûr Eman yedine karındaşlarım Mehmed ve Mustafa’ya ver deyû doksan riyâlî guruş def‘ ü teslîm edip fevt olmağla yedinde kalmış idi hâlâ meblağ-ı mezbûr doksan riyâlî guruşdan nısf hisse-i ma‘lûmemi taleb ederim, suâl olunsun dedikde gıbbe’s-suâl mezbûr Eman cevâbında fi’l-vâki‘ müteveffâ-yı mezbûr hayâtında karındaşım Mehmed’e ver deyû bana doksan guruş verip bu dahi meblağ-ı mezbûr doksan guruşu ba‘de’l-vefât mezbûr Mehmed Beşe’ye def‘ ü teslîm edip hattâ meblağ-ı mezbûru hîn-i teslîmde müdde‘î-i mezbûr Mustafa karındaşım müteveffâ-yı mezbûrun bana Mehmed Beşe’ye teslîm eyle deyû verdiği doksan guruşa müte‘allika seninle da‘vâm yoktur deyû huzûr-ı müslimînde ikrâr ve işhâd dahi etmişdir deyicek gıbbe’l-istintâk ve’l-inkâr mezbûr Eman Ermeni’den takrîr-i meşrûhunu nâtık beyyine taleb olundukda udûl-i müslimînden olup mahmiye-i İstanbul’da Darbhâne kurbunda sâkin iplikçi tâifesinden Osman b. Hasan ve Alacamescid mahallesinde sâkin Mustafa Çelebi b. el-Hâc Rıdvan nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Eman Ermeni, karındaşım müteveffâ-yı mezbûrun sana Mehmed Beşe’ye ver deyû def‘ ü teslîm eylediği doksan guruşa müte‘allika seninle da‘vâm yoktur deyû bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Mustafa bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: El-Hâc Ahmed Çelebi b. Mahmud, Şükrullah b. Mustafa, Veli b. Mahmud, Abdi b. Hüseyin, Mehmed b. Ramazan, Hüseyin b. Ebûbekir, Resûl b. Rıdvan.