İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 518 Hüküm no: 656 Orijinal metin no: [58b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Bursa Kadısı Mustafa Efendi’nin Hocapaşa mahallesindeki arsasını Kayış Mustafa Efendi vakfına verdiği Arsa-i vakıfdan kasr-ı yed Mahrûse-i Bursa kazâsından münfasıl umdetü’l-ulemâ’i’l-izâm üsvetü’l-fuzalâ’i’l-fihâm metbû‘ü’l-efâzıl ve’l-e‘âlî Mustafa Efendi b. ( ) taraf-ı bâhirü’ş-şereflerinden husûs-ı câi’z-zikre vekîl olup Abdülvehhab b. Mehmed ve Ali Çelebi b. İsmail şehâdetleri ile vekâleti sâbite olan kethüdâları Ebûbekir Ağa b. Ali meclis-i şer‘-i hatîr-i lâzımü’t-tevkīrde merhûm Kayış Mustafa Efendi vakfına mütevellî olan râfi‘ü’l-kitâb Hüseyin Çelebi b. Mustafa muvâcehesinde bi’l-vekâle ikrâr ve i‘tirâf edip müvekkil-i müşârün-ileyh Mustafa Efendi vakf-ı mezbûrdan olup Hocapaşa kurbunda vâki‘ etrâf-ı selâsesi vakf-ı mezbûra ve bir tarafı tarîk-i âma müntehî olup ücreteyn-i ma‘lûmeteyn ile mutasarrıf olduğu menzil harîkde muhterik olup arsa-i sırfa kalıp cânib-i vakıfdan müceddeden binâya müsâ‘ade olmayıp mu‘accelesine mahsûb olmak üzre binâya kendiler dahi rağbet etmeyip arsa-i mezbûreden kasr-ı yed ve mütevellî-i mezbûra vakıf için teslîm eylediler. Fîmâ-ba‘d müvekkil-i müşârün-ileyhin arsa-i mezbûrede hak ve alâkası yoktur dedikde vekîl-i mezbûru ikrâr-ı meşrûhunda mütevellî-i mezbûr vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, Baba Resûl b. Rıdvan.