İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 519 Hüküm no: 657 Orijinal metin no: [58b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Bey b. Mirkelam İbrahim Ağa’nın babasının alacaklı olduğu iddiasıyla Yorgaki v. Dimitri aleyhine açtığı davanın reddi Men‘ Dârü’l-hilâfeti’l-aliyye Kostantıniyye el-mahmiyye’de Molla Gürânî mahallesinde sâkin iken bundan akdem fevt olan Mîrkelâm İbrahim Ağa nâm kimesnenin sulbî kebîr oğlu ve bi’l-inhisâr vârisi fahrü’l-akrân Ömer Bey dîvân-ı kāimmakām-ı sadr-ı a‘zamîde ma‘kūd meclis-i şer‘-i hatîr-i lâzımü’t-tevkīrde işbu bâ‘isü’s-sifr Yorgaki v. Dimitri nâm zimmî muvâcehesinde üzerine da‘vâ ve takrîr-i kelâm edip babam müteveffâ-yı mezbûr sıhhatinde târih-i kitâbdan otuz bir sene mukaddem mezbûr Yorgaki’ye malından altı bin yüz kıt‘a riyâlî-i kebîr guruş ikrâz ve teslîm edip mezbûr Yorgaki dahi istikrâz ve tesellüm eyledikden sonra kable’l-istîfâ babam mezbûr İbrahim Ağa altı sene mürûrunda fevt oldukda, meblağ-ı mezbûr irs-i şer‘î ile bana isâbet ve intikāl etmişdir hâlâ meblağ-ı mezbûr altı bin yüz kıt‘a riyâlî guruşu mezbûr Yorgaki’den taleb ederim, suâl olunsun dedikde mezbûr Ömer Bey’in da‘vâ-yı merkūmesi bilâ-emr istimâ‘ olunmayıp ve merkūm Yorgaki’ye dahi suâl teveccüh etmemeğin, mezbûr Ömer Bey bî-vech mu‘ârazadan men‘ olunup mâ vaka‘a bi’t-taleb ketb olundu. Fî evâili şehri Ramazâni’l-mübârek li sene erba‘a ve seb‘în ve elf. Şuhûdü’l-hâl: Fahrü’l-a‘yân Muhtesib Ağası Mehmed Ağa, Fahrü’l-akrân Abdünnebî Ağa b. Resûl, Fahrü’l-eşbâh Mehmed Ağa sermuhzırân, Ali Beşe çukadar.