İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 520 Hüküm no: 659 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Çelebi’nin Abdi Subaşı mahallesindeki menzil hissesini üvey babası Hasan Odabaşı’ya sattığı Mülknâme Mahmiye-i İstanbul’da Abdi Subaşı mahallesi sâkinelerinden olup bundan akdem fevt olan Ayşe Hâtun bt. Ali’nin verâseti zevci Hasan Odabaşı ile sadrî kebîr oğlu Pîr Mehmed Çelebi b. Mustafa’ya münhasıra olduğu şer‘an zâhir oldukdan sonra merkūm Pîr Mehmed Çelebi meclis-i şer‘-i şerîf-i şâmihu’l-imâdda râfi‘ü’l-kitâb merkūm Hasan Odabaşı muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı kantarcı Hasan ve bir tarafı Ahmed Efendi ve bir tarafı Mahmud Ağa mülklerine ve taraf-ı râbi‘i tarîk-i âma müntehî dâhilen ve hâricen büyûtu ve matbah ve ahırı ve tahtapûş ve bahçe ve bi’r-i mâ ve kenîfi müştemil cemî‘ menzilin nısf-ı şâyi‘i benim ve nısf-ı âharı vâlidem mezbûre Ayşe’nin mülkü olup hâlâ menzil-i mezbûrda olan nısf hisse-i şâyi‘am ile vâlidemin nısf hissesinden bana müntakil dört sehimden üç sehim hisse-i şâyi‘amı işbu üveyi babam mezbûr Hasan Odabaşı’ya altmış bin akçeye bâtten bey‘ ve teslîm eyleyip ol dahi iştirâ ve tesellüm ve kabûl ettikden sonra meblağ-ı mezbûr altmış bin akçeyi tamâmen alıp kabz eyledim ba‘de’l-yevm menzil-i mezbûrda hak ve alâkam kalmadı ba‘de’l-yevm cemî‘ menzil-i mezbûr mezkûr Hasan Odabaşı’nın irsen ve şirâen mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharrem li sene 1074. Şuhûdü’l-hâl: Umdetü’l-mevâliyyü’l-fihâm Ahmed Efendi, Ahmed Efendi b. Mahmud, Abdullah Efendi el-İmâm, el-Hâc Mehmed, el-Hâc Derviş Odabaşı, Hasan Çelebi b. Mustafa, Mustafa Bey b. Kalender, Abdullah Efendi b. İbrahim el-İmâm, Halil Çelebi b. Ahmed, Hasan Halîfe el-Müezzin, Bayram b. Mehmed, Ramazan odabaşı.