İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 525 Hüküm no: 668 Orijinal metin no: [59b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mahmud’un çiçekçi iken vefat eden babasının yerine geçen İvaz b. Ayas’ın zimmetini ibrâ ettiği İbrâ Mahmiye-i İstanbul’da Aksaray kurbunda Hacı Bayram mahallesi sâkinelerinden Fâtıma bt. Mahmud meclis-i şer‘-i hatîrde râfi‘ü’l-kitâb İvaz b. Ayas muvâcehesinde ikrâr ve takrîr-i kelâm edip babam mezbûr Mahmud mukaddemâ Aksaray sûkunda çiçekci iken fevt olup yerine çiçekci gediğine mezbûr İvaz geçmişdi hâlâ mezbûr İvaz babamın ol çiçekci dükkânında mevcûd otuz bin akçelik yemiş ve çiçek ve tabla ve sepet kabz eyledin deyû da‘vâ etmişdi hâlâ fâriğ olup husûs-ı mezbûra müte‘allik da‘vâdan ve mezbûr İvaz zikr olunan gediğe geçdikde, bana ol gedik için maktûl Ahmed Paşa’da olan yüz otuz beş bin akçe yemiş akçesi mukābelesinde aldığımız hâs mahsûlünden sana hisse vereyim deyû va‘d etmiş idi ana müte‘allika da‘vâda dahi mezbûr İvaz’ın zimmetini ibrâ-i âmm-ı kātı‘ü’n-nizâ‘ ile ibrâ eyledim. Fîmâ-ba‘d zikr olunan husûsa müte‘allika mezbûr İvaz ile da‘vâ ve nizâ‘ım yoktur dedikde gıbbe’t-tasdîk mâ vaka‘a bi’t-taleb ketb olundu. Fî gurreti Safer li sene 1074. Şuhûdü’l-hâl: Ahmed b. Abdülcebbar, Mustafa es-Sarrâc, Ali Beşe er-Râcil, Mahmud b. Mehmed, Osman Bey el-cündî.