İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 526 Hüküm no: 669 Orijinal metin no: [59b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Hacı Mehmed b. Abdullah’ın hayatta iken Rus kölesi Rıdvan’ı azat ettiği Itâknâme İşbu orta boylu elâ gözlü açık kaşlı Rusiyyü’l-asl bâ‘isü’l-kitâb Rıdvan b. Abdullah meclis-i [60a] şer‘-i hatîr-i lâzımü’t-tevkīrde ekmeci tâifesinden olup fevt olan el-Hâc Mehmed b. Abdullah’ın vasiyy-i muhtârı Ali Ağa b. Mahmud muvâcehesinde üzerine da‘vâ ve takrîr-i kelâm edip sâbıkan ben mezbûr Ekmekçi el-Hâc Mehmed’in abd-i memlûkü olup hâl-i sıhhatinde beni i‘tâk ve tahrîr etmiş idi. Terekeden olmak üzre vasiyy-i mezbûr bana vaz‘-ı yed eyledi. Suâl olunup kasr-ı yedine tenbîh olunmak taleb ederim deyicek gıbbe’s-suâl vasiyy-i mezbûr müdde‘î-i mezbûra vaz‘-ı yedini mukır ve vech-i muharrer üzre müteveffâ-yı mezbûr hâl-i sıhhatinde i‘tâk ve tahrîr ettiğini münkir olıcak müdde‘î-i mezbûr Rıdvan’dan müdde‘âsını mübeyyene beyyine taleb olundukda udûl-i ricâlden olup mahmiye-i İstanbul’da Unkapanı kurbunda Papasoğlu mahallesi sâkinlerinden Ali b. Beşir ve Yusuf b. Yakub nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Ekmekçi el-Hâc Mehmed hâl-i sıhhatinde işbu merkūm Rıdvan’ı bizim huzûrumuzda i‘tâk ve tahrîr eyledi. Mezbûr Rıdvan sâir ahrâr gibi hürdür, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylemekleri ile gıbbe’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm müdde‘î-i mezbûrdan kasr-ı yedine vasiyy-i mezbûra tenbîh olunup mâ vaka‘a gıbbe’t-taleb ketb olundu. Şuhûdü’l-hâl: Çavuşzâde Hüseyin Efendi, Zahrü’l-emsâl Ebûbekir Ağa b. Murad, Hüseyin Bey b. Abdullah, Ali Bey el-Cündî Kurt b. Himmet, Şaban b. Abdullah, el-Hâc Ahmed b. Mahmud, Resûl b. Rıdvan.