İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 527 Hüküm no: 670 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühânî bt. Ahmed’in menzilini Seyyid İbrahim Çelebi b. Seyyid Mehmed’e sattığı Mülknâme Mahmiye-i İstanbul’da Neslişah Sultan mahallesi sâkinelerinden Ümmühânî bt. Ahmed nâm kimesne meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-evtâdda, râfi‘ü’l-kitâb Seyyid İbrahim Çelebi b. Seyyid Mehmed muvâcehesinde ikrâr ve i‘tirâf edip mahalle-i merkūmede vâki‘ bir tarafı mezbûr Seyyid İbrahim Çelebi mülkü ve bir tarafı Ömer Beşe mülkü ve bir tarafı Hüseyin Beşe mülkü ve bir tarafı tarîk-i hâs ile mahdûd fevkānî ve tahtânî iki bâb odaları ve müşterek bi’r-i mâ ve zât-ı eşcâr-ı müsmire [ve] cüneyne ve kenîfi müştemil mülk menzilimi, cemî‘ tevâbi‘ ve levâhık ve kâffe-i hukūk ve merâfıkı ile mezbûr Seyyid İbrahim Çelebi’ye on beş bin nakd-i fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyleyip ol dahi iştirâ ve kabûl ettikden sonra semen-i mezbûr on beş bin akçeyi mezbûr Seyyid İbrahim Çelebi yedinden tamâmen alıp kabz eyledim ba‘de’l-yevm menzil-i mezbûr cemî‘ tevâbi‘i ile mezbûrun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırra-i mezbûrenin ikrâr-ı meşrûhunu mezbûr Seyyid İbrahim Çelebi vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene erba‘a ve seb‘în ve elf. Şuhûdü’l-hâl: Mustafa Efendi b. Ali el-İmâm, Mehmed Çelebi ed-Dâ‘î, Mustafa Halîfe el-Müezzin, Ali b. İsâ, Ahmed Beşe b. Mehmed, Ali b. Bâli, Ömer Beşe b. Yahya.