İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 527 Hüküm no: 671 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yani’nin vârislerinden karısı Kokona bt. Apostolaki’nin miras hususunda diğer vâris Kiko v. Kisa’nın zimmetini ibrâ ettiği İbrâ Mahmiye-i İstanbul’da Hızır İlyas mahallesi ahâlîsinden iken hâlik olan Nikola v. Yani nâm zimmînin verâseti, zevce-i metrûkesi Kokona bt. Apostolaki nâm nasrâniyye ile sulbiye kebîre kızları İrhonca ve Mariyora nâm nasrâniyyelere münhasıra oldukdan sonra mezbûre Kokona tarafından husûs-ı âti’z-zikre vekîl olup Tiryano v. Pireşkovar ve Yorgaki v. Pireşkovar nâm zimmîler şehâdetleri ile vekâleti sâbite olan Panayot v. Nikola nâm zimmî ve merkūmetân İrhonca ve Mariyora taraflarından husûs-ı câi’z-zikre vekîl olup şâhidân-ı mezbûrân şehâdetleri ile vekâleti sâbite olan Yorgaki v. Pireşkovar nâm zimmî meclis-i şer‘de hâlik-i mezbûrun terekesine vâzı‘u’l-yed olan hâmilü’l-kitâb Kiko v. Kisa nâm zimmî muvâcehesinde bi’l-vekâle ikrâr edip hâlik-i mezbûrun terekesinden mezbûr Kiko yedinde olan yirmi beş bin akçe veresesi mezbûrâna intikāl etmekle meblağ-ı mezbûru veresesine teslîm için yedinden alıp kabz eyledik. Min ba‘d meblağ-ı mezbûrun mezbûr zimmî yedinde bir akçe bâkī kalmadı dediklerinde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene erba‘a ve seb‘în ve elf. Şuhûdü’l-hâl: Mustafa Çavuş b. İbrahim el-Mübâşir, çukadar Ali Beşe, Receb Çavuş b. Mustafa, sarrâc Mustafa Beşe, Ömer Çelebi b. Mehmed.