İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 543 Hüküm no: 698 Orijinal metin no: [62a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtibe bt. Abdullah’ın boşandığı kocası el-Hâc İbrahim’in zimmetini ibrâ ettiği Hul‘ Husûs-ı âti’l-beyânın mahallinde tahrîri için gıbbe iltimâs kıbel-i şer‘den irsâl olunan Mevlânâ Hasan Efendi b. Mehmed mahmiye-i İstanbul’da Üskübî mahallesinde el-Hâc İbrahim nâm kimesnenin menziline varıp akd eylediği meclis-i şer‘de mahalle-i mezbûre sâkinelerinden Kâtibe bt. Abdullah nâm hâtun zevc-i mutallıkı merkūm el-Hâc İbrahim mahzarında ikrâr-ı tâm ve takrîr-i kelâm edip merkūm el-Hâc İbrahim beni talâk-ı bâ’in ile tatlîk eyledikde mezbûrun zimmetinde mütekarrir ve ma‘kūdun-aleyh olan iki bin beş yüz akçe mehr-i müeccelim ve nafaka-i iddet-i ma‘lûmem ve me’ûnet-i süknâm için dahi dört yüz elli akçe ki cem‘an iki bin dokuz yüz elli akçeyi mezbûr el-Hâc İbrahim yedinden tamâmen ahz u kabz edip zevciyyete ve gayra müte‘allika cemî‘ da‘vâdan her birimiz âharın zimmetini ibrâ-i âm ve kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû meclis-i şer‘a gelip âlâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Saferi’l-hayr li sene erba‘a ve seb‘în ve elf. Şuhûd[ü’l-hâl]: İvaz Efendi b. Ali, el-Hâc Yusuf b. Abdullah, Mehmed Efendi b. Atıye?, el-Hâc Ali b. Ebussuûd, Mehmed b. Himmet, Derviş b. Hasan, Baba Resûl.