İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 546 Hüküm no: 703 Orijinal metin no: [62b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bolu’nun Kayı köyünde vefat eden Kapıcı el-Hâc Oruc b. Musa’nın terekesinin vârislerine verildiği Mülknâme ve tefvîz-i tarla Vilâyet-i Anadolu’da Bolu kazâsı müzâfâtından Kayı nâm karye ahâlîsinden iken vefât eden kapıcı el-Hâc Oruc b. Musa’nın verâseti zevceteyn-i metrûketeyni Hatîce bt. Satı‘ ve Ayşe bt. İsâ nâm hâtunlara ve sulbî kebîr oğulları Hasan ve Mehmed’e ve sagīr oğlu Sâlih’e münhasıra ve tashîh-i mes’elesi kırk sekiz sehimden olup altı sehimi zevceleri mezbûretâna ve on dörder sehimi oğulları mezbûrûna isâbet eylediği şer‘an zâhir oldukdan sonra, mezbûrân Hasan ve Mehmed asâleten ve mezbûretân taraflarından husûs-ı âtîye vekîl olup [ber-] nehc-i şer‘î-i mu‘teber üzre vekâleti sâbite olan Râbia bt. Ahmed nâm hâtun vekâleten meclis-i şer‘de hâmilü’l-kitâb Âşur b. Satı‘ nâm kimesne mahzarında, her biri ikrâr ve takrîr-i kelâm edip müteveffâ-yı mezbûr el-Hâc Oruc’un terekesinden olup karye-i mezbûrede vâki‘ lede’l-ahâlî ma‘lûmü’l-hudûd olan bir bâb fevkānî odayı ve altında ahırı ve bir çatma anbarı müştemil mülk menzilden cem‘an hisselerimizi yedi yüz dört akçeye mezbûr Âşur’a bey‘ ve ol dahi vech-i muharrer üzre iştirâ ve kabûl ve tapu ile tasarrufunda olup intikāl-i âdî ile bize ve sagīr-i mezbûr Sâlih’e intikāl edip karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd Abdi gölü dedikleri bir kıt‘a tarla ve Akpınar tarlası dedikleri bir kıt‘a tarla ve Yunus yeri dedikleri bir kıt‘a tarla ve Anar yeri dedikleri bir kıt‘adan hisse-i şâyi‘alarımızı iki bin altı yüz altmış altı akçe bedel mukābelesinde sâhib-i arz izni ile ferâğ ve tefvîz, ol dahi teveffüz ve kabûl eyledikden sonra semen-i mezbûr ile bedel-i mezbûrdan hissemize isâbet eden akçeyi mezbûr Âşur yedinden alıp kabz edip ol menzil ve tarlalardan hisselerimizi mahallinde teslîm ve zabta mezbûr Âşur’u taslît eyledik dediklerinde, ba‘de’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene erba‘a ve seb‘în ve elf. Şuhûdü’l-hâl: Müstakīm Efendi b. Musa, Ali Seyyid b. Süleyman, Kemal Efendi b. Nurullah, Musa Efendi b. Mehmed, Ahmed Çelebi b. Mahmud, Abdi b. Hüseyin ve gayruhüm.