İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 547 Hüküm no: 704 Orijinal metin no: [62b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Samadya kapısında Meyhaneci Kiga v. Ğavcı’nın evini Palaş v. Manol’e sattığı Mülknâme Mahmiye-i İstanbul’da Samadya kapısında meyhâneci Kiga v. Gavcı? nâm zimmî meclis-i şer‘-i hatîr-i lâzımü’t-tevkīrde hâmilü’l-kitâb Palaş v. Manol mahzarında tav‘an ikrâr ve takrîr-i kelâm edip Fener kapısı dâhilinde Abdi Subaşı mahallesinde vâki‘ bir tarafdan sarrâc Polidre zimmî ve bir tarafdan Palaş v. Seryano zimmî mülkleri ve bir tarafdan hisâr duvarı ve bir tarafdan tarîk-i âm ile mahdûd ve mümtâz olup üç bâb fevkānî oda ve tahtapûş ve bi’r-i mâ ve kenîfi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık seksen beş bin üç yüz akçeye mezbûr Palaş zimmîye bey‘-i kat‘î ile bey‘ ve teslîm ol dahi vech-i muharrer üzre iştirâ ve tesellüm eyledikden sonra, semeni olan meblağ-ı mezbûr seksen beş bin üç yüz akçeyi [63a] mezbûr Palaş yedinden tamâmen alıp kabz eyledim min ba‘d menzil-i mezbûr merkūm Palaş’ın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene erba‘a ve seb‘în ve elf. Şuhûdü’l-hâl: Abdi Çelebi b. Hüseyin, Mehmed Beşe b. Süleyman, Yusuf Beşe b. Mansur, Hasan Beşe b. Abdullah, Mustafa b. Hasan, İbrahim Beşe b. Abdullah, çukadar Ali Beşe, Mehmed Beşe b. Abdullah, Abdi Çelebi el-Muhzır, Kostantin v. Yorgi, Yorgi v. Yani, Palaş v. Dimitri, Kostantin v. Toma, İstemati v. Dimitri, Laskari v. Nikola, Manol v. Toma, Tarako v. Arkiri, Manol v. Yani, Petraki Sarrâc.