İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 547 Hüküm no: 705 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Mihail’in iflas ederek ölen Toma’ya kefâleti sebebiyle, Simon v. Haçador’a ödeme yaptığı Sulh Mahmiye-i İstanbul’da Ermeni tâifesinden Nikola v. Mihail nâm Ermeni, meclis-i şer‘de hâmilü’l-kitâb Simon v. Haçador nâm Ermeni muvâcehesinde tav‘an ikrâr ve takrîr-i kelâm edip sâbıkan Ermeni tâifesine patrik olup ba‘dehû müflisen hâlik olan Toma v. ( ) nâm Ermeni zimmetinde karzdan olan iki bin yüz yirmi beş riyâlî guruşa emri ile kefîl olmuş idik. Meblağ-ı mezbûru, mezbûrdan kable’l-ahz mezbûr müflisen hâlik oldu ver deyû mezbûr Simon’dan da‘vâ eylediğimde mezbûr Simon inkâr edip ben dahi ikāmet-i beyyineden âciz olmağla da‘vâ-yı mezbûreden an inkâr mezbûr Simon ile yirmi bir riyâlî guruşa sulh olup ol dahi sulh-ı mezbûru kabûl ve bedel-i sulh olan yirmi bir riyâlî guruşu mezbûr Simon yedinden alıp kabz edip kefâlet-i mezbûreye müte‘allika da‘vâdan mezbûrun zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk, mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene 1074. Şuhûdü’l-hâl: Abdi Çelebi b. Hüseyin, Mehmed Çelebi b. Abdullah, Şükür Bey, Baba Resûl, Asvador v. Murad, Gazar v. Kumru, Asvador v. Agop, Arkil v. Bahtiyar, Mikail, Sefer v. Karakuş, Toros.