İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 548 Hüküm no: 707 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Şaban’ın, Keresteci Sâlih Çelebi’ye olan borcunu vârislerine ödediği İbrâ Mahmiye-i İstanbul’da Âşık Paşa mahallesinde sâkin iken bundan akdem vefât eden Keresteci Sâlih Çelebi’nin sulbî oğulları İbrahim ve Halil ve İsmail’in tesviye-i umûrlarına kıbel-i şer‘den vasîleri olan Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde Mustafa b. Şaban nâm kimesne mahzarında bi’l-vesâye ikrâr ve takrîr-i kelâm edip müteveffâ-yı mezbûrun merkūm Şaban zimmetinde her biri sekizer dirhem olmak üzre on iki riyâl guruş hakkı olup kable’l-ahz vefât etmekle meblağ-ı mezbûr irsen sıgār-ı mezbûrûna intikāl eylemiş idi hâlâ vesâyetim hasebiyle meblağ-ı mezbûr on iki riyâl guruşu mezbûr Mustafa Çelebi yedinden bi’t-tamâm ahz u kabz eyledim ba‘de’l-yevm müteveffâ-yı mezbûrun mezbûr Mustafa zimmetinde bir akçe ve bir habbe hakkı bâkī kalmadı dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’s-sâlis aşer min Saferi’l-hayr li sene 1074. Şuhûdü’l-hâl: Mehmed b. Mustafa, Hacı Yusuf b. Musa, Resûl b. Rıdvan, Mehmed b. Ramazan, Şükrullah b. Mustafa, Ahmed b. Abdülcebbar.