İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 554 Hüküm no: 715 Orijinal metin no: [63b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karagümrük’teki Kethüdâ Kadın mahallesinden Bakkal el-Hâc Receb b. Mahmud’un terekesinin vârisleri arasında paylaşıldığı İbrâ Mahmiye-i İstanbul’da Karagümrük kurbunda vâki‘ Kethüdâ Kadın mahallesi sâkinlerinden olup fevt olan Bakkal el-Hâc Receb b. Mahmud’un verâseti, zevce-i metrûkesi Zamâne bt. Abdullah ile sagīr oğlu Mehmed’e münhasıra olup ba‘de’l-kısme mezbûr Mehmed dahi fevt olup verâseti vâlidesi mezbûre Zamâne ile ibn ammi Ahmed b. Hasan’a münhasıra olduğu şer‘an zâhir oldukdan sonra mezbûre Zamâne Hâtun meclis-i şer‘de râfi‘ü’l-kitâb mezbûr Ahmed ile sagīr-i mezbûrun hayâtında vasîsi olan Abdülkādir Beşe b. Ebûbekir muvâcehesinde ikrâr ve i‘tirâf edip zevcem müteveffâ-yı mezbûrun cemî‘ terekesinden sümün hissem olan iki bin dokuz yetmiş bir akçe hakkımı ve iki bin iki yüz akçe mehr-i müeccelim mukaddemâ vasiyy-i mezbûr yedinden alıp kabz eyleyip ba‘dehû fevt olan oğlum sagīr-i mezbûrun mecmû‘ terekesinden sülüs hissem altı bin yedi yüz otuz üç akçe hakkımı dahi vasiyy-i mezbûr ile merkūm Ahmed yedinden alıp kabz eylemiş idim. Lâkin mezbûr Ahmed ve vasiyy-i mezbûrdan terekeden olmak üzre Mülâyim nâm câriyemi ahz ve vaz‘-ı yed eylediniz deyû da‘vâ ve müdde‘âmı isbât edememekle, mezbûr Ahmed’e adem-i ilme yemîn verip ve vasiyy-i mezbûrdan dahi zikr olunan terekeden ba‘zı eşyâ ahz ve ihfâ eyledin deyû da‘vâ ettiğimde, müdde‘âmı isbâtdan âciz olup kezâlik vasiyy-i merkūm Abdülkādir Beşe’ye dahi yemîn verdikden sonra ben dahi husûs-ı mezbûra müte‘allika âmme-i de‘âvî ve mütâlebâtdan vasiyy-i mezbûrun ve merkūm Ahmed’in zimmetlerin ibrâ-i âmm-ı kātı‘ü’n-nizâ‘ ile ibrâ ve iskāt eyledim. Fîmâ ba‘d zikr olunan husûsa müte‘allika mezbûrlar ile vicâhen mine’l-vücûh da‘vâ ve nizâ‘ım yoktur dedikde gıbbe’t-tasdîk, mâ vaka‘a bi’t-taleb ketb olundu. Fi’l-yevmi’s-sâlis aşer min Saferi’l-hayr li sene 1074. Şuhûdü’l-hâl: Receb Çavuş b. Mustafa Çavuş, Ahmed Efendi b. Yusuf, Müezzin Mustafa, Mehmed Çelebi b. Ahmed, el-Hâc Ahmed b. Mahmud, Mustafa b. İsâ, Baba Resûl b. Rıdvan.