İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 554 Hüküm no: 716 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İvaz Efendi b. Fazlullah’ın, Mustafa Efendi b. Süleyman’a kefâletten kaynaklanan borcunu ödemesi gerektiği İsbât-ı kefâlet Merhûm-ı mağfiret-nişân Yahya Efendi hazretlerinin medrese-i celîlelerinde sâkin Mustafa Efendi b. Süleyman nâm kimesne meclis-i şer‘-i hatîrde İvaz Efendi b. Fazlullah nâm kimesne mahzarında üzerine da‘vâ ve takrîr-i kelâm edip mahmiye-i İstanbul’da Cebecibaşı mahallesinde sâkin iken bundan akdem vefât eden Ebezâde Mehmed Sadeddin Efendi b. Mehmed’in zimmetinde iki yüz nakid esedî guruş ve yedimden müşterâ ve makbûz iki re’s bârgir semeninden yüz esedî guruş ki cem‘an üç yüz esedî guruş hakkım olup emrimle meblağ-ı mezbûra merkūm İvaz Efendi kefâlet-i sahîha-i şer‘iyye ile kefîl olmuş idi hâlâ kefâleti hasebiyle meblağ-ı mezbûru merkūm İvaz Efendi’den taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûr Mustafa Efendi’den müdde‘âsını mübeyyine beyyine taleb olundukda udûl-i müslimînden olup medîne-i Galata’ya tâbi‘ kasaba-i Tophâne’de Câmi‘-i Kebîr mahallesi sâkinlerinden Mehmed b. Süleyman ve Mehmed b. Fazlullah nâm kimesneler meclis-i şer‘a li ecli’ş-şehâde hâzırân olup istişhâd olundukda fi’l-vâki‘ müdde‘î-i mezbûrun vech-i muharrer üzre mezbûr Mehmed Sadeddin zimmetinde olan üç yüz esedî guruş hakkına mezbûr İvaz Efendi bizim huzûrumuzda emriyle kefâlet-i sahîha ile kefîl oldu. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinden sonra şâhidân-ı mezbûrân âdiller olup her biri makbûlü’ş-şehâde olduğunu mahmiye-i mezbûrede Molla Ahî mahallesi sükkânından Mehmed Ağa b. Halil ve Yusuf Çelebi b. Hüseyin nâm kimesneler meclis-i şer‘de haber verdiklerinden sonra şehâdetleri makbûle olmağın mûcebince meblağ-ı mezbûr üç yüz esedî guruşu kefâleti hasebiyle müdde‘î-i mezbûr Mustafa Efendi’ye edâ ve teslîme merkūm İvaz Efendi’ye tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene 1074. Şuhûdü’l-hâl: Mehmed Ağa b. Receb, İbrahim Çelebi b. Mehmed, Mustafa Çelebi b. el-Hâc Ahmed, İbrahim Çelebi b. Abdullah, Ali Çelebi b. Mustafa, Sofu Mehmed Efendi el-Kâtib, çukadar Ali Beşe, İsmail Efendi b. Abdüsselam, Seyyid Mustafa Çelebi.