İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 555 Hüküm no: 717 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydarhâne mahallesinden Timurhan bt. Abdullah Hâtun ile Mustafa Çelebi b. Ali’nin muhâlaa yoluyla boşandıkları Hul‘ Mahmiye-i İstanbul’da Haydarhâne mahallesinde sâkine Timurhan bt. Abdullah nâm hâtun tarafından husûs-ı âti’l-beyânı ikrâra vekîl olup zâtını ma‘rifet-i şer‘iyye ile ârifân es-Seyyid Muslu Çelebi b. es-Seyyid Ömer ve es-Seyyid Mustafa Çelebi b. es-Seyyid Habîb şehâdetleri ile şer‘an vekâleti sâbite olan Osman Ağa b. Hüseyin meclis-i şer‘de bâ‘isü’l-kitâb zevci Mustafa Çelebi b. Ali mahzarında bi’l-vekâle ikrâr ve takrîr-i kelâm edip müvekkilem mezbûrenin mezbûr Mustafa Çelebi zimmetinde mütekarrir ve ma‘kūdun-aleyh olan üç bin akçe mehr-i müecceli ve nafaka-i iddet-i ma‘lûme üzerlerine ve me’ûnet-i süknâsı dahi kendi üzerine olmak üzre ve bedel-i hul‘ için kendi malından yedi yüz akçe dahi vermek üzre mezbûr Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her biri âharın zimmetini ibrâ-i âm ile ibrâ eyledi dedikde gıbbe’t-tasdîk, mâ vaka‘a bi’t-taleb ketb olundu. Fi’l-yevmi’l-hâdî aşer min Saferi’l-hayr li sene erba‘a ve seb‘în ve elf. Şuhûd[ü’l-hâl]: Seyyid Hüseyin Efendi b. es-Seyyid Mahmud, Mahmud Ağa b. Yahya, Abdurrahman el-Kasap, Ali Çelebi b. Mustafa, Mahmud Çelebi b. İsmail ve gayruhüm.