İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 556 Hüküm no: 718 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çizmeci Hasan b. Abdullah ile Pepeyi v. Velço arasındaki yaralama davasında sulh oldukları Sulh Mahmiye-i İstanbul’da Sultan Selim Hân câmi‘-i şerîfi kurbunda Çukurbostan mahallesinde sâkin Çizmeci Hasan b. Abdullah tarafından husûs-ı âtîye vekîl olup Musa b. Mustafa ve Mustafa b. Ahmed nâm kimesneler şehâdetleri ile vekâleti sâbite olan Sâliha bt. Abdullah nâm hâtun meclis-i şer‘-i hatîr-i lâzımü’t-tevkīrde Pepeyi v. Velço nâm zimmî mahzarında tav‘an ikrâr ve takrîr-i kelâm edip mezbûr zimmî elinde olan demir beli aşağı bırakdıkda hatâ’en ol bel müvekkilim mezbûr Hasan’ın sol pazusuna dokunup mecrûh eyledikden sonra mûcibini mezbûrdan taleb ve da‘vâ eyledikde beynlerine muslihîn tavassut etmekle müvekkilim mezbûr Hasan da‘vâ-yı merkūmeden an inkâr mezbûr ile sekiz yüz akçe üzerine sulh olup ol dahi sulh-ı mezbûru kabûl ve bedel-i sulh olan sekiz yüz akçeyi mezbûr zimmî yedinden tamâmen alıp kabz edip da‘vâ-yı mezbûreden mezbûr zimmî zimmetini ibrâ ve iskāt eyledi dedikde gıbbe’t-tasdîk, mâ vaka‘a bi’t-taleb ketb olundu. Fi’l-yevmi’l-âşir min Saferi’l-hayr li sene 1074. Şuhûdü’l-hâl: Siyami Efendi b. Veli, Durmuş Beşe b. Halil, Ahmed Çelebi b. Mehmed, Mahmud Kethüdâ b. Abdurrahim, Mustafa Çelebi b. İsâ, Durmuş Beşe b. Halil.