İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 559 Hüküm no: 724 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Paşa-yı Atik mahallesinden Sâliha bt. Ahmed’in evini Ayşe bt. Hacı Mehmed’e sattığı Mülknâme Mahmiye-i İstanbul’da Ali Paşa-yı Atîk mahallesinde sâkine Sâliha bt. Ahmed nâm hâtun tarafından husûs-ı âtîye vekîl olup zâtını ma‘rifet-i şer‘iyye ile ârifân olan Hamza Beşe b. Bilâl ve Hasan Çelebi b. Mehmed nâm kimesneler şehâdetleri ile vekâleti sâbite olan fahrü’l-müderrisîn Mehmed Efendi b. Mehmed Efendi meclis-i şer‘-i lâzımü’t-tevkīrde sadriyye kızı Ayşe bt. Hacı Mehmed tarafından tasdîk-ı âtîye vekîl olan İsmail Çelebi b. Hüseyin mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Sâliha Hâtun silk-i mülkünde münselik olup mahalle-i mezkûrede vâki‘ bir cânibi Kazgancızâde sarayına ve bir cânibi Etyemez Dede tekyesine ve bir cânibi kendi mülküne ve bir cânibi tarîk-i âm müntehî beş bâb fevkānî odayı ve bir sofa ve bir kenîfi ve iki bâb tahtânî oda ve su kuyusunu ve iki kenîfi müştemil menzilini, tevâbi‘i ve levâhıkı ve kâffe-i hukūk ve merâfıkı ile müvekkile-i merkūme Ayşe Hâtun’a altmış sekiz bin akçeye tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra semeni olan meblağ-ı mezbûr altmış sekiz bin akçeyi mezkûre Ayşe Hâtun yedinden bi’t-tamâm alıp kabz edip ba‘de’l-yevm menzil-i mahdûd-ı mezkûr mezbûre Ayşe Hâtun’un mülk-i müşterâsı olup keyfe mâ yeşâ’ ve yahtâr tasarruf eylesin dedi dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene erba‘a ve seb‘în ve elf. Şuhûdü’l-hâl: Fahrü’l-müderrisîn Ahmed Efendi b. Hasan, Şeyhîzâde Şeyh Mehmed Efendi, eş-Şeyh Ali Efendi b. eş-Şeyh Hasan, Ahmed Efendi b. Yusuf el-İmâm, Mustafa Çelebi b. Rıdvan el-Müezzin, Hacı Hüseyin Ağa b. Nasûh, İsmail Çelebi b. Hüseyin, Mehmed Çelebi b. Ahmed, Hasan Çelebi b. Mehmed, Abdi Çelebi b. Ahmed, Hüseyin Efendi el-Brusî el-Kâtib, Ahmed Çelebi b. Mahmud kethüdâ-yı muhzırân, Abdi Çelebi b. Hüseyin, Şükür Bey b. Mustafa, Mehmed b. Ramazan.