İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 567 Hüküm no: 737 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Musa b. Ali’nin ölümüyle, vârislerden Mustafa Çelebi b. Ahmed Ağa’nın hissesini aldığına dair beyanı İbrâ Mahmiye-i İstanbul’da Mi‘mâr Ayas mahallesinde fevt olan el-Hâc Musa b. Ali’nin verâseti, zevce-i metrûkesi Hatîce bt. Abdullah ile karındaşı oğlu Mustafa Çelebi b. Ahmed Ağa’ya münhasıra olduğu şer‘an müte‘ayyin oldukdan sonra merkūm Mustafa Çelebi meclis-i mutahharda, mezbûre Hatîce Hâtun tarafından zikri âtî husûsa vekîl olup mezbûreyi bi’l-ma‘rifeti’ş-şer‘iyye ârifân olan İmâm Abdüllatif Efendi ve Hasan Çelebi b. Muharrem şehâdetleri ile vekâleti sâbite olan Mustafa b. Ahmed muvâcehesinde ikrâr ve i‘tirâf edip mûrisim mezbûr el-Hâc Musa hâl-i sıhhatinde mahalle-i mezbûrede vâki‘ birbirine muttasıl iki kıt‘a menzilinin birini bana ve bir kıt‘asın mezbûre Hatîce’ye hibe ve temlîk etmiş idi hâlâ fevt oldukda akār ve menkūl ve nukūd ve esâs-ı beyt ve sâir kalîl ve kesîr ism-i mal ıtlâk olunur cemî‘ terekesinden bana isâbet eden dört sehimden üç sehim hisse-i şâyi‘amı mezbûre Hatîce yedinden alıp kabz eyleyip min ba‘d tereke-i müteveffâ-yı mezbûrda bir akçe ve bir habbe hak ve alâkam yoktur ve mezbûre Hatîce’ye hibe olunan menzilde vâki‘ arsa üzerine mezbûr el-Hâc Musa binâ ihdâs etmekle ba‘de’l-vefât zikr olunan binâ için mevrûsdur deyû merkūme Hatîce’den da‘vâ eylemiş idim, hâlâ fâriğ olup bu husûsa müte‘allika cemî‘ de‘âvî ve mütâlebât ve eymân ve muhâsamâtdan mezbûre Hatîce’nin zimmetini ibrâ-i âmm-ı kātı‘ü’n-nizâ‘ ile ibrâ eyledim dedikde mezbûr Mustafa Çelebi’nin cemî‘ kelimâtını vekîl-i mezbûr vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene 1074. Şuhûdü’l-hâl: El-Hâc Mustafa b. el-Hâc Osman, el-Hâc Hasan b. Mustafa, Mehmed Çelebi b. Yusuf Hasan Beşe es-Sarrâc, Hasan Beşe el-Kayyım.