İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 568 Hüküm no: 738 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Sinan’a ait köleyi kaybetmesi sebebiyle, Mehmed b. Sâlih’in kölenin değerini ödemesi gerektiği Mahmiye-i İstanbul’da Kızıltaş mahallesi ahâlîsinden bâ‘isü’l-kitâb Mehmed Ağa b. Sinan meclis-i şer‘-i hatîr-i lâzımü’t-tevkīrde Mehmed Bey b. Sâlih nâm kimesne mahzarında üzerine da‘vâ edip ben seksen iki esedî guruş kıymet-i şer‘iyyeli Rusiyyü’l-asl Rıdvan b. Abdullah nâm abd-i memlûkümü, bugün bey‘ edip akçesini kabz ve bana teslîm eyle hilâfını eyleme deyip mezbûrun yedine teslîm edip mezbûr Mehmed Bey dahi alıp kabz eyledikden sonra emrime muhâlefet edip ol gulâmı Kürd Ali nâm gāibe emânet verdikden sonra ol gulâm mezbûr Kürd Ali yedinde iken müstehlek olmağın kıymet-i şer‘iyyesini mezbûr Mehmed Bey’den taleb ederim suâl olunsun dedikde gıbbe’s-suâl mezbûr Mehmed Bey cevâbında fi’l-vâki‘ hâl müdde‘î-i mezbûr Mehmed Ağa’nın da‘vâ eylediği minvâl üzredir deyû ikrâr etmeğin ikrârı mûcebince kıymet-i mezbûre seksen iki esedî guruşu müdde‘î-i mezbûr Mehmed Ağa’ya edâya mezbûr Mehmed Bey’e tenbîh olunup mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene 1074. Şuhûdü’l-hâl: Mehmed Çavuş el-Mübâşir, Abdurrahman b. Mahmud, Abdurrahman b. Mehmed, Mehmed Çelebi b. Abdullah, Ahmed Ağa b. Cafer, Mehmed Çelebi b. Turgud, Ahmed Çelebi b. Mahmud, Abdi Çelebi b. Hüseyin, Şükür Bey b. Mustafa.