İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 568 Hüküm no: 739 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadri Beşe b. Ali hayattayken azat etmiş olduğu Rus asıllı Mustafa b. Abdullah’a, vârislerin müdahalede bulunmaması İsbât-ı ıtk Orta boylu açık kaşlı elâ gözlü Rusiyyü’l-asl bâ‘isü’l-kitâb Mustafa b. Abdullah meclis-i şer‘-i hatîrde mahmiye-i İstanbul’da Hoca Hayreddin mahallesinde sâkin iken bundan akdem vefât eden Kadri Beşe b. Ali’nin zevce-i metrûkesi Şahbaz Hâtun bt. Abdullah ve kebîre kızı Fâtıma’nın vekîl-i şer‘îsi Durmuş b. Mehmed ve sagīr oğlu Mustafa ve Ayşe’nin vasiyy-i şer‘îleri Ahmed Çelebi b. İbrahim muvâcehelerinde üzerlerine da‘vâ ve takrîr-i kelâm edip ben sâbıkan mezbûr Kadri Beşe’nin abd-i memlûkü olup hâl-i sıhhatinde beni tahrîr ve i‘tâk ve sâir ahrâr-ı müslimîn zümresine idrâc ve ilhâk edip hürrü’l-asl gibi olmuş iken, verese-i mezbûre bana rakīk olmak üzre vaz‘-ı yed ve kabz etmişlerdir, suâl olunup benden yedleri kasr ve izâle olunmak matlûbumdur dedikde gıbbe’s-suâl vasiyy-i mezbûr ve vekîl-i merkūm ve mezbûre Şahbaz cevâblarında, husûs-ı mezbûru münkir olıcak mezbûr Mustafa’dan takrîr-i meşrûhunu mübeyyine beyyine taleb olundukda mahalle-i mezbûre ahâlîsinden udûl-ı ricâlden Ahmed Efendi b. Mahmud el-imâm ve Ali Beşe b. Abdullah ve Ömer Efendi b. Ali el-imâm ve Hüseyin b. Sefer nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffâ-yı mezbûr Kadri Beşe hâl-i sıhhatinde işbu mezbûre Mustafa’yı bizim huzûrumuzda tahrîr ve i‘tâk ve sâir ahrâr-ı müslimîn zümresine idrâc ve ilhâk eyledi. Mezbûr Mustafa sâir ahrâr gibi hürdür, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mezbûr Mustafa’dan kasr-ı yedlerine mezbûrlara tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Saferi’l-hayr li sene 1074. Şuhûdü’l-hâl: Mustafa b. Menteş, el-Hâc Ahmed b. Mahmud, Şükrullah b. Mustafa, Abdi Çelebi b. Hüseyin.