İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 569 Hüküm no: 740 Orijinal metin no: [66a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Paşa vakfına ait olan kayıkhâneyi kullanan Halil Çelebi b. Ali’ye engel olunması Mahmiye-i İstanbul’da Karabaş mahallesi ahâlîsinden hâfızü’l-kitâb İbrahim Ağa b. Mehmed nâm kimesne meclis-i şer‘-i hatîr-i lâzımü’t-tevkīrde zikri âtî vakıf kayıkhâneye vâzı‘u’l-yed olduğu şer‘an sâbit ve zâhir olan Halil Çelebi b. Ali nâm kimesne mahzarında mütevellîsi Mehmed Çelebi b. Ahmed muvâcehesinde üzerine da‘vâ ve takrîr-i kelâm edip mezbûr Halil Çelebi’nin Sekbanbaşı Ramazan Ağa vakfından olup icâre-i mu‘accele ve ücret-i müeccele ile mutasarrıf olduğu lede’l-ahâlî ma‘lûmü’l-hudûd kayıkhânenin Hâssa mi‘mârlardan olan üstâd Ali b. Abdullah mesâha eylediği tûlen on yedi zirâ‘ ve arzen altı parmak yeri, lede’l-ahâlî ma‘lûmü’l-hudûd olup vech-i muharrer üzre tasarrufumda olan Bakī Paşa vakfından iken mezbûr Halil Çelebi bî-vech vaz‘-ı yed edip tasarruf eder, suâl olunup zikr olunan yerden kasr-ı yedine tenbîh olunmak matlûbumdur dedikde gıbbe’s-suâl ve’l-inkâr ve akībe’l-istişhâd udûl-i müslimînden mahalle-i merkūme ahâlîsinden el-Hâc Mustafa b. el-Hâc Abdullah ve Mehmed Bey b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ mezbûr Halil Çelebi’nin Sekbanbaşı vakfından olmak üzre mutasarrıf olduğu kayıkhânenin mezbûr üstâd Ali mesâha eylediği tûlen on yedi zirâ‘ ve arzen altı parmak yeri Bakī Paşa vakfı olup müdde‘î-i mezbûrun tasarrufunda olan yerdendir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânı mahallinde tezkiyye için irsâl olunan Mevlânâ Brusî Hüseyin Efendi mahalle-i merkūmeye varıp ahâlîsinden sırren ve alenen suâl eyledikde mahalle-i merkūme imâmı İsmail Efendi ve Ömer Beşe b. Ali ve el-Hâc Mehmed b. Ali ve Osman Beşe b. Hüseyin ve Ali Beşe b. Hüseyin ve Receb Beşe b. Abdullah ve Mehmed Beşe b. Abdullah ve Seyyid Ahmed b. Seyyid Mehmed ve Dellâl Emir Mustafa b. Ahmed nâm kimesneler şâhidân-ı mezbûrân-ı udûl ve makbûlü’ş-şehâde oldukların haber verdiklerin Mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihi inhâ etmeğin şehâdetleri makbûle olmağın mesâha olunan yerden mezbûr Halil Çelebi’nin kasr-ı yedine tenbîh olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Saferi’l-hayr li sene 1074. Şuhûdü’l-hâl: Mehmed Ağa b. Hamza ağa-yı ihtisâb, Abdülkerim Ağa muhzırbaşı, Hüseyin Efendi el-Brusî el-Kâtib, Ahmed Çelebi b. Mahmud, Şükür Bey b. Mustafa, Abdi Çelebi b. Hüseyin, Mehmed b. Resûl, Baba Resûl.