İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 570 Hüküm no: 741 Orijinal metin no: [66a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed Ağa b. Mustafa Ağa’nın evini İbrahim Ağa b. Mustafa Ağa’ya sattığı Mübâdeletü’l-menzil bi’l-menzil Mahmiye-i İstanbul hısnı ebvâbından Topkapısı kurbunda Bayezid Ağa mahallesi ahâlîsinden el-Hâc Mehmed Ağa b. Yusuf meclis-i şer‘-i hatîr-i lâzımü’t-tevkīrde fahrü’l-a‘yân İbrahim Ağa b. Mustafa Ağa mahzarında ikrâr ve takrîr-i kelâm edip silk-i mülkümde olup mahalle-i merkūmede vâki‘ iki cânibi müşârün-ileyh İbrahim Ağa mülkü ve bir cânibi Mehmed Bey ve bir cânibi Mezarcı Mehmed mülkleri ile mahdûd iki bâb tahtânî oda ve bir sofayı müştemil menzilimi tevâbi‘ ve levâhıkı ve kâffe-i merâfıkı ile müşârün-ileyh İbrahim Ağa’nın mülkü olup mahalle-i mezbûrede vâki‘ bir tarafı Raziye Hâtun vakfı ve bir tarafı Sâime Sultân -dâmet ismetühâ- mülkü ve bir tarafı tarîk-i hâs ve bir tarafı tarîk-i âm ile mahdûd olup bir beyt-i ulvî ve bir beyt-i süflî ve sofa ve ulviyye ve cüneyneyi müştemil menzili bey‘ ve teslîm ve müşârün-ileyh [66b] İbrahim Ağa dahi iştirâ ve tesellüm edip menzilimin mukābelesinde verdiğim menzili alıp kabz eyledim min ba‘d menzil-i mezbûr müşârün-ileyhin mülkü olup keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene 1073. Şuhûdü’l-hâl: Mefharü’l-emâcid ve’l-akrân Mahmud Ağa emîn-i gümrük, Mustafa Efendi el-İmâm, Hüseyin Halîfe el-Müezzin, Murtaza Halîfe el-Müezzin, Hacı Mustafa b. Abdullah, Ali Bey Hocazâde, Mehmed b. Ramazan.