İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 571 Hüküm no: 742 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fener kapısında oturan Zafire adlı nasraniyenin Hoca Osman vakfından aldığı borcunu ödediği Mahmiye-i İstanbul’da Fenerkapısı kurbunda sâkine Zafire bt. ( ) nâm nasrâniyye meclis-i şer‘de merhûm Hoca Osman vakfına mütevellî olan râfi‘ü’l-kitâb el-Hâc Ömer b. Ali muvâcehesinde ikrâr ve takrîr-i kelâm edip mâl-ı vakf-ı mezbûrdan zimmetimde iki yüz altmış dört buçuk riyâlî guruş olup meblağ-ı mezbûr mukābelesinde eşyâ-i memlûkemden yetmiş tane incili bir çift küpem ve bir al çuka ferâce kaplı samur paçası kürk ve on zirâ‘ erguvânî kemha ve on dal incili saçlık ve bir gümüşlü bıçağım mütevellî-i mezbûr yedine rehin vaz‘ etmişdim hâlâ mütevellî-i mezbûr meblağ-ı sâlifü’z-zikri vakıf için hâkim-i muvakki‘-i sadr-ı kitâb huzûrunda benden da‘vâ ve ba‘de’s-sübût hâkim-i müşârün-ileyh dahi rihân-ı mezbûru bey‘ ve mâl-ı vakf-ı mezbûru edâya bana tenbîh ve rihân-ı mezbûru bey‘ için yanıma adam ta‘yîn edip ben dahi rihân-ı mezbûrdan zikr olunan incili küpeyi bey‘a arz ve sûk-ı sultânîde beş altı gün müzâyede olundukdan sonra on bin akçe semen-i misli ile bey‘ edip meblağ-ı mezbûr on bin akçeyi taraf-ı vakfa zikr olunan deynim için tahte’l-hesâb mütevellî-i mezbûra teslîm edip ol dahi ahz u kabz ve tesellüm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Saferi’l-hayr li sene erba‘a ve seb‘în ve elf. Şuhûd[ü’l-hâl]: Şükrullah b. Mustafa, Abdi b. Hüseyin, el-Hâc Ahmed b. Mahmud, Mustafa b. İsâ ve gayruhüm.