İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 571 Hüküm no: 743 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyhaneci Panayot v. Cano’nun, Andruco v. Nikolaki v. Andruco’dan başka vârisi olmadığı İsbât-ı verâset Vilâyet-i Rumeli’de Mizistre sükkânından râfi‘ü’l-vesîka Andruco v. Nikolaki v. Andruco nâm zimmî meclis-i şer‘-i hatîrde Lanbo v. Yorgi nâm zimmî muvâcehesinde üzerine da‘vâ edip mahrûse-i Galata’da hâlik olan meyhâneci Panayot v. Cano v. Andruco nâm hâlikin babası mezbûr Cano ile benim babam mezbûr Nikolaki li ebeveyn karındaşlar olup babaları mezbûr Andruco ve anaları Kiryako nâm nasrâniyye ve maskat-ı re’sleri zikr olunan Mizistre olup hâlik-i mezbûrun ben ibn ammi ve min ciheti’l-usûbeti’n-nesebiyye hasren vârisi olmağla mezbûr Lanbo v. Yorgi’nin zimmetinde olan mûrisimin bin akçe hakkı bi hasebi’l-irs bana intikāl etmiş iken, mezbûr Lanbo meblağ-ı mezbûru bana edâdan imtinâ‘ eder, suâl olunup alıverilmek matlûbumdur dedikde gıbbe’s-suâl mezbûr Lanbo meblağ-ı mezbûr zimmetinde olduğunu ikrâr, lâkin müdde‘î-i mezbûrun vech-i muharrer üzre verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda zikr olunan Mizistre sâkinlerinden olup elân mahrûse-i mezbûrede Karaköy kapısı kurbunda terzi Yorgaki v. Yano ve Panayot v. Kanalo nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Andruco’nun babası mezbûr Nikolaki ile hâlik-i mezbûrun babası merkūm Cano li ebeveyn karındaşlardır, babaları mezbûr Andruco anaları mezbûre Kiryako ve maskat-ı re’si Mizistre’dir, müdde‘î-i mezbûr hâlik-i mezbûrun li ebeveyn bin ammi ve min ciheti’l-usûbeti’n-nesebiyye hasren vârisidir, hâlik-i mezbûrun merkūm Andruco’dan gayrı vârisi ve terekesine âhar müstahıkkı olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’z-tezkiyye şehâdetleri makbûle olmağın mûcebiyle ba‘de’l-hükm meblağ-ı mezbûru müdde‘î-i mezbûra edâ ve teslîme mezbûr Lanbo’ya tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Saferi’l-hayr li sene 1074. Şuhûdü’l-hâl: Şükrullah b. Mustafa, Abdi Çelebi b. Hüseyin, el-Hâc Ahmed b. Mahmud, Mustafa b. İsâ, Veli b. Mahmud, Hüseyin b. Ebûbekir, Rıdvanzâde Resûl, Hızır b. Abdünnebî.