İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 572 Hüküm no: 744 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun’un, Kasım Ağa mahallesindeki eve ait hissesini Mustafa Çelebi b. Halil’e sattığı Mülknâme-i hisse-i menzil Mahmiye-i İstanbul’da Kasım Ağa mahallesinde sâkine iken bundan akdem fevt olan Fâtıma’nın verâseti, sadriyye kızları Aynî ve Râbia ve oğlunun oğlu Yahya’ya münhasıra olduğu müte‘ayyin oldukdan sonra mezbûre Râbia Hâtun meclis-i şer‘-i hatîrde kız karındaşı oğlu Mustafa Çelebi b. Halil mahzarında ikrâr-ı tâm ve takrîr-i kelâm edip mûrisem müteveffât-ı mezbûrenin terekesinden mahalle-i mezbûrede vâki‘ bir tarafdan ba‘zan müezzin vakfı ve ba‘zan Ayşe Kadın mülkü ve bir tarafdan Medîne-i Münevvere vakfı ve bir tarafdan Ahî Can mülkü ve bir tarafdan tarîk-i âm ile mahdûd menzilden bana isâbet eden üç sehimden bir sehim hisse-i şâyi‘amı kız karındaşım oğlu mezbûr Mustafa’ya on bin akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve kabûl eyledikden sonra meblağ-ı mezbûr on bin akçeyi mezbûr Mustafa yedinden tamâmen ahz u kabz eyledim ba‘de’l-yevm menzil-i mezbûrda olan bir sehim hisse-i şâyi‘am merkūm Mustafa’nın mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene erba‘a ve seb‘în ve elf. Şuhûdü’l-hâl: Mustafa Beşe b. Rıdvan, es-Seyyid Cafer Efendi b. es-Seyyid Abdülkerim, el-Hâc Şaban b. Musa, Süleyman Çelebi b. Hasan, Ali Beşe Çukadar, Baba Resûl b. Rıdvan, Şükür Bey b. Mustafa, Abdi Çelebi b. Hüseyin.