İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 573 Hüküm no: 745 Orijinal metin no: [66b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Ağa mahallesinden Fâtıma bt. Semender’in Mustafa Beşe b. Halil’e olan borcunun, vârisleri tarafından ödenmesi İsbât-ı vasiyyet Mahmiye-i İstanbul’da Kasım Ağa mahallesinde sâkine iken vefât eden Fâtıma bt. Semender nâm hâtunun verâseti, sulbiye kebîre kızları Aynî ve Râbia bt. ( ) nâm hâtunlar ile sadrî oğlunun oğlu Yahya’ya münhasıra olduğu müte‘ayyin oldukdan sonra mezbûre Aynî Hâtun’un sadrî oğlu Mustafa Beşe b. Halil nâm kimesne meclis-i şer‘-i hatîr-i lâzımü’t-tevkīrde müteveffât-ı merkūmenin tereke-i vâfiyyesine vâzı‘atü’l-yed olan mezbûre Râbia Hâtun mahzarında üzerine da‘vâ edip müteveffât-ı merkūme Fâtıma Hâtun târih-i kitâbdan üç ay mukaddem Mustafa’ya karzdan dört bin akçe deynim vardır deyû maraz-ı mevtinde ikrâr edip ba‘dehû kable’l-edâ vefât etmekle meblağ-ı mezbûru tereke-i vâfiyyesine vâzı‘atü’l-yed olan mezbûre Râbia Hâtun’dan taleb ederim, suâl olunsun dedikde gıbbe’s-suâl mezbûre Râbia Hâtun tereke-i müteveffât-ı merkūmeye vaz‘-ı yedini ikrâr, lâkin müteveffât-ı merkūme maraz-ı mevtinde mezbûr Mustafa’ya dört bin akçe deyn ikrâr eylediğin inkâr eyledikde müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Seyyid Mehmed Çelebi b. Seyyid Cafer Efendi ve Hacı Abdurrahman b. Mustafa Çelebi ve Mustafa Çelebi b. Rıdvan nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ mezbûre Fâtıma Hâtun târih-i kitâbdan üç ay mukaddem kızım Aynî’nin oğlu mezbûr Mustafa’ya karzdan dört bin akçe deynim vardır deyû maraz-ı mevtinde huzûrumuzda ikrâr edip kable’l-edâ fevt oldu. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın meblağ-ı mezbûru tereke-i vâfiyyesinden mezbûr Mustafa’ya edâ ve teslîme mezbûre Râbia tenbîh birle mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene 1074. Şuhûdü’l-hâl: Es-Sâbikūn.