İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 573 Hüküm no: 746 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyârbekir’in Çüngüş kazası ahalisini, cizyedar vekiliyim diyerek aldatan Abrid v. Harok’un engellenmesi [Men‘] Vilâyet-i Anadolu’da Diyârbekir sancağında Çüngüş kazâsı ahâlîsinden Allahverdi v. Vartuk ve Yani v. Sefer ve Sefer v. Vartuk ve Enbiya v. Bahtiyen ve Haçuk v. Mosi ve Andon v. Haçer ve İsrail v. Vartuk ve Kirkor v. Karabet ve Türkmen v. Melkon ve Kerem v. İbrişim ve Hızır? v. Markar ve Yasef v. Ahtiyen ve Ovanes v. Şağvat? ve Ovanes v. Aleksi ve Toros v. Yakob nâm zimmîler ve sâiri meclis-i şer‘-i hatîr-i lâzımü’t-tevkīrde kazâ-i mezbûr re‘âyâsından Abrid? v. Haruk nâm Ermeni muvâcehesinde üzerine her biri da‘vâ ve takrîr-i kelâm edip kadîmü’l-eyyâmdan kazâ-i mezbûr re‘âyâsından ve sâiri her sene üzerimize edâsı lâzım gelen cizyelerimizi cem‘a me’mûr olanlara veregelmiş iken, mezbûr Abro ben cizyedâr tarafından cizyelerinizi kabz ve tesellüme vekîlim deyû yetmiş iki senesinde bizden cizye talebi ile bizi rencîde vü remîde etmiş idi el-hâletü hâzihî târih-i kitâb senesinde dahi cizyedâr tarafından minvâl-i muharrer üzre vekîlim deyip kavl-i mücerredi ile bizi rencîde vü remîdeden hâlî olmadığından mâ‘adâ, her birimiz her ganem ile tağrîm âdet-i müstemirresi olan ehl-i örfe tağrîm ettirmek âdeti olup nicemiz ol ecilden terk-i vatan etmişizdir hâlâ mezbûr bizi bî-vech rencîde vü remîde etmemek için taraf-ı şer‘den men‘ olunmak bâbında yedimizde buyruldu-i şerîf vardır. Mezbûr Abro’dan suâl olunsun dedikde gıbbe’s-suâl mezbûr Abro dahi cevâbında vech-i muharrer üzre vekâlet-i mezbûresini bir vech ile isbâta kādir olmayıp fuzûlen mezbûrûnu rencîde eylediğin ikrâr etmeğin ikrârı mûcebince mezbûr zimmî bî-vech rencîde vü remîde eylemekden men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene erba‘a ve seb‘în ve elf. Şuhûdü’l-hâl: Hüseyin Efendi el-Brusî, Abdi Çelebi b. Hüseyin, Ahmed Çelebi b. Mahmud, Şükür Bey b. Mustafa, Mehmed Çelebi b. Abdullah, Mehmed b. Ramazan, Baba Resûl b. Rıdvan.