İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 574 Hüküm no: 747 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı köle Dilaver’in Mustafa Çelebi’ye ait olduğu Navluncu tâifesinden Mustafa Çelebi b. Ali meclis-i şer‘de el-Hâc Mehmed b. ( ) nâm kimesne mahzarında üzerine da‘vâ edip târih-i kitâbdan bir buçuk sene mukaddem mezbûr el-Hâc Mehmed gāib ani’l-meclis Rusiyyü’l-asl Dilaver nâm şâbb-ı emred abd-i memlûkünu, on dört bin akçeye bana bey‘ ve ben dahi vech-i muharrer üzre iştirâ eylediğimden sonra semeni olan on dört bin akçeyi bana deyni olan on dört bin akçe on akçesine takās ben dahi takāss-ı mezbûru kabûl eylediğimden sonra gulâm-ı mezbûru müdde‘î-i mezbûra semen-i mezbûr on dört bin akçeye bey‘ ve semenini deyn-i mezbûre takās eylediğini inkâr etmeğin müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Mustafa Efendi b. Ali el-Kâtib ve Ahmed Beşe b. Hüseyin nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ mezbûr el-Hâc Mehmed bir buçuk sene mukaddem gulâm-ı mezbûru müdde‘î-i mezbûra on dört bin akçeye huzûrumuzda bey‘ ol dahi iştirâ eyledikden sonra semeni olan meblağ-ı mezbûru deyn-i mezbûru on dört bin on akçesine takās ve mezbûr Mustafa Çelebi dahi takāss-ı mezbûru kabûl eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın gulâm-ı mezbûru müdde‘î-i merkūm Mustafa Çelebi’ye teslîme mezbûr Hacı Mehmed’e tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min Zilka‘deti’ş-şerîfe li sene 1074. Şuhûdü’l-hâl: Ahmed Beşe, Ahmed Çelebi b. Mahmud, çukadar Ali Beşe, Ömer Ağa b. Hamza el-Cündî Abdi Çelebi, Mustafa Beşe, Şükür Bey.