İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 575 Hüküm no: 748 Orijinal metin no: [67a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Receb’den muhâlaa yoluyla boşanan Servisehi bt. Abdullah’ın, kocasından aldığı mehri geri ödemesi Mahmiye-i İstanbul’da İbrahim Paşa mahallesi sâkinlerinden Ahmed Beşe b. Receb nâm kimesne meclis-i şer‘-i şerîfde Servisehi bt. Abdullah nâm hâtun mahzarında üzerinde da‘vâ ve takrîr-i kelâm edip mezbûre Serushi mukaddemâ benim zevcem iken zimmetimde olan üç bin beş yüz akçe mehr-i müeccel ve nafaka-i iddet-i ma‘lûmesi ve me’ûnet-i süknâsı üzerlerine benim ile muhâla‘a edip zevciyyete müte‘allika âmme-i de‘âvîden zimmetimi ibrâ ettikden sonra, ehl-i örfe istinâd ile cebren benden mehr-i müecceli olan meblağ-ı mezbûr üç bin beş yüz akçeyi bi gayri hakkın ahz eylemişdir taleb ederim, suâl olunup geri alıverilmek matlûbumdur dedikde gıbbe’s-suâl merkūme Serushi zevci mezbûr ile vech-i meşrûh üzre muhâla‘a eyledikden sonra vech-i muharrer üzre mehr-i müecceli üç bin beş yüz akçeyi aldığını ikrâr etmeğin ikrârı mûcebince bi gayr-ı vech-i şer‘î aldığı üç bin beş yüz akçeyi müdde‘î-i merkūm Ahmed Beşe’ye edâ ve teslîme tenbîh birle mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene 1074. Şuhûdü’l-hâl: Ali Beşe b. Osman Çukadar, Ali Çelebi b. Mustafa el-Müezzin, Halil Beşe b. İbrahim, Şükrullah Bey b. Mustafa, Abdi Çelebi b. Hüseyin, Ali Çelebi b. Muharrem, Mehmed b. Ramazan.