İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 575 Hüküm no: 749 Orijinal metin no: [67a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülgün bt. Abdullah’ın, evini, vefâen Mustafa Ağa b. Mehmed Efendi’ye sattığı Bey‘ bi’l-vefâ Mahmiye-i İstanbul’da Cebecibaşı mahallesinde sâkine Gülgün bt. Abdullah Hâtun tarafından husûs-ı âtîye vekîl olup zâtını ma‘rifet-i şer‘iyye ile ârifân Mustafa Bey b. Abdullah ve Ramazan Çelebi b. Üveys nâm kimesneler şehâdetleri ile vekâleti sâbite olan Ali Beşe b. el-Hâc Şaban nâm meclis-i şer‘de hâfızü’l-kitâb Mustafa Ağa b. Mehmed Efendi mahzarında bi’l-vekâle ikrâr ve ta‘bîr-i kelâm edip müvekkile-i mezbûre Gülgün Hâtun’un silk-i mülkünde olup mahalle-i mezbûrede vâki‘ bir cânibi Habîb Çelebi mülküne ve bir cânibi Ahmed Ağa mülküne ve bir cânibi Mehmed Ağa b. Ferhad mülküne ve bir cânibi tarîk-i âm müntehî üç bâb tahtânî odaları ve bir sofa ve ahırı ve iki su kuyusunu ve hadîkayı müştemil menzilini, tevâbi‘ ve levâhıkı ve kâffe-i hukūk ve merâfıkı ile mezbûr Mustafa Ağa’ya târih-i kitâb şehri gāyetinden bir sene tamâmına değin müeccel olmak üzre bey‘ bi’l-vefâ tarîki ile bin kıt‘a esedî guruşa bey‘ ve teslîm ol dahi vech-i muharrer üzre iştirâ ve tesellüm edip semeni olan bin kıt‘a esedî guruşu alıp kabz eyledi dedikde gıbbe’t-tasdîki’l-mu‘teber meblağ-ı mezbûru mezbûre Gülgün Hâtun’un zevci Hüseyin Ağa b. Bünyad emri ile kefîl olmağın mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene 1074. Şuhûdü’l-hâl: El-Hâc İsmail Efendi b. Mehmed, Ahmed Çelebi b. Mustafa, Abdüllatif Çelebi b. Muslu, Ali Ağa b. Ahmed, Ahmed Çelebi b. Abdullah, Mehmed Çelebi b. Abdullah, Hasan Çelebi b. Abdullah, Abdi Çelebi b. Hüseyin.