İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 577 Hüküm no: 751 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdi ile kızı Fâtıma bt. Mehmed’in uygunsuz hareketleri sebebiyle Emin Nûreddin mahallesinden çıkarılmaları Mahalleden ihrâc Mahmiye-i İstanbul’da Emin Nûreddin mahallesi ahâlîsinden İbrahim Efendi el-imâm ve Abdurrahman Beşe b. Süleyman ve Hüseyin Bey b. Hasan ve Mehmed b. Mustafa ve Hasan b. Ömer ve İbrahim Çelebi b. Mustafa ve Mehmed b. Abdurrahman ve Hacı Ali b. Hacı Ali ve Hasan Beşe b. Abdi ve Ahmed b. Cafer ve Mehmed b. Abdi nâm kimesneler ve sâirleri meclis-i şer‘de Sâliha bt. Abdi ve kızı Fâtıma bt. Mehmed mahzarlarında her biri takrîr-i kelâm edip mezbûreler bed-lisân ve bed-fi‘l olup herbâr ba‘zılarımıza şetm ve ba‘zılarımız darb ettikleri sebeb ile mezbûrelerin akvâl ve ef‘âlinden müte’ellim ve müte’ezzîleriz. Hattâ mezbûreler mahalle-i merkūmeden ihrâc olunmağa yedimizde buyruldu-i şerîf dahi olmağla mezbûreler mahalle-i mezkûreden çıkmağa tenbîh olunmak murâdımızdır deyû ittifâk ve kavillerine muvâfık buyruldu-i şerîf ibrâz eylediklerinde mezbûretân Sâliha ve Fâtıma mahalle-i mezbûreden çıkmağa ba‘de’t-tenbîh, mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene 1074. Şuhûdü’l-hâl: Ahmed b. Abdülcebbar, Şükür Beşe b. Mustafa, Abdi Çelebi b. Hüseyin, Muharrem b. Abdullah, Baba Resûl b. Rıdvan, Mehmed b. Ramazan.