İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 577 Hüküm no: 752 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harsi bt. Yako adlı yahudi kadının evini, Mustafa Ağa b. Cafer’e sattığı Tefvîz-i menzil Mahmiye-i İstanbul’da Kordava cemâ‘atinden Harsi bt. Yako nâm yahudiye meclis-i şer‘-i hatîrde râfi‘ü’l-kitâb Mustafa Ağa b. Cafer muvâcehesinde tâyi‘aten ikrâr ve i‘tirâf edip Balatkapısı dâhilinde vâki‘ bir tarafı Davud Paşa vakfından olan arsa-i hâliye ve bir tarafı İbrahim Hânzâde odaları ve bir tarafı Bâli Bey nâm kimesne mülkü ve bir tarafı tarîk-i âm ile mahdûd olup fevkānî ve tahtânî büyûtu ve matbah ve muhtib ve bi’r-i mâyı ve arsa-i hâliye ve mahzeni müştemil olup arsasının beher sene merhûm Hâfız Ahmed Paşa vakfına üç yüz altmış akçe mukāta‘ası olan menzilimin üzerinde olan ebniye-i memlûkesi mezkûr Mustafa Ağa’ya yüz yedi bin akçeye bâtten bey‘ ve teslîm edip ol dahi iştirâ ve kabûl ettikden sonra meblağ-ı mezbûr yüz yedi bin akçeyi yedlerinden bi’t-tamâm alıp kabz edip arsasın dahi vakf-ı mezbûr mütevellîsi ma‘rifetiyle müşterî-i mezbûra ferâğ ve tefvîz eyleyip ol dahi tefevvüz ve kabûl eyledi ba‘de’l-yevm ebniye-i memlûke mezbûr Mustafa Ağa’nın mülkü ve arsa-i mezbûre hakk-ı müfevvazıdır dedikde mukırra-i mezbûre yahudiyeyi müşterî-i mezbûr Mustafa Ağa vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Saferi’l-hayr li sene 1074. Şuhûdü’l-hâl: Abdülgani Beşe b. Eyüb, Mehmed Beşe b. Süleyman, Berber Mehmed Çelebi, Mehmed Çelebi Çukadar, el-Hâc Ahmed b. Mahmud, Osman Bölükbaşı, Resûl b. Rıdvan, Mustafa Beşe es-Sarrâc, Mustafa b. İsâ.