İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 578 Hüküm no: 754 Orijinal metin no: [67b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hacı Mustafa’nın, boşandığı karısı Fâtıma bt. Yakup’tan ev tamiri ile alakalı para istememesi gerektiği İsbât-ı hul‘ Mahmiye-i İstanbul’da Murad Paşa-yı Atîk mahallesi sükkânından Ahmed b. Hacı Mustafa nâm kimesne meclis-i şer‘-i hatîrde zevce-i mutallakası Fâtıma bt. Yakub nâm hâtun mahzarında üzerine da‘vâ ve takrîr-i kelâm edip mezbûr[e] Fâtıma’nın emri ile evinin ta‘mîr [ve] termîmine harc ve sarf eylediğim on iki bin akçe hakkımın altı bin akçesini alıp kabz edip bâkī zimmetinde altı bin akçesi kalmışidi hâlâ meblağ-ı mezbûr ile yedinde emânet olan bir minder ve bir döşeğimi mezbûrdan taleb ederim suâl olunsun dedikde gıbbe’s-suâl mezbûre Fâtıma cevâbında fi’l-vâki‘ kaziyye minvâl-i muharrer üzre idi. Lâkin mukaddemâ mezbûr ile muhâla‘a eylediğimde mezbûr Ahmed meblağ-ı mezbûr akçe ile ol minder ve döşekden çekip zimmetimi ibrâ ve iskāt edip yedime ibrâ hücceti vermişdi deyû mazmûnu takrîr-i meşrûhunu nâtık ibrâ hücceti ibrâz edip mezbûr Ahmed muvâcehesinde ol hüccet kırâ’at ve istintâk olundukda mazmûn-ı hücceti tav‘an ikrâr etmeğin ikrâr mûcebince mezbûr Ahmed bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene erba‘a ve seb‘în ve elf. Şuhûdü’l-hâl: Abdi Çelebi b. Maksud, Mustafa Beşe b. Rıdvan, İsmail b. Mustafa, Mehmed Çelebi b. Hızır, Muharrem Çelebi b. Şükür Bey.