İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 579 Hüküm no: 755 Orijinal metin no: [67b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kastamonu’nun Çiriş mahallesinden Mehmed b. Muslu’nun, bahçesini Mehmed b. Muslu’ya sattığı Mülknâme-i bahçe Vilâyet-i Anadolu’da Kastamonu kasabası mahallâtından Çiriş mahallesi sükkânından Mustafa b. Muslu mahfil-i kazâda, işbu bâ‘isü’l-kitâb Mehmed b. Muslu tarafından husûs-ı âti’l-beyâna sâbitü’l-vekâle olan Mustafa b. Mehmed mahzarında ikrâr ve takrîr-i kelâm edip mahalle-i mezbûrda vâki‘ bir tarafı Bey hamamı ve bir tarafı Hacı Abidin mülkü ve bir tarafı Osman mülkü ve bir tarafı tarîk-i âm müntehî eşcâr-ı müsmire ve gayr-i müsmireyi müştemil mülk bahçenin nısfı benim ve nısf-ı âharı Receb nâm kimesnenin mülkü olup ve bu âna değin mezbûr Receb ile müşâ‘an mutasarrıflar idik hâlâ zikr olunan bahçeden nısf hisse-i şer‘iyye-i mukarreremi müvekkil-i mezbûr Mehmed Bey nakd-i râyic fi’l-vakt akçeye tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ol dahi minvâl-i muharrer üzre iştirâ ve kabûl eyledikden sonra semeni olan meblağ-ı mezbûr bin akçeyi vekîl-i mezbûr Mustafa yedinden bi’t-tamâm ahz u kabz edip mahallinde kabza müvekkil-i mezbûr Mehmed’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Saferi’l-hayr li sene erba‘a ve seb‘în ve elf. Şuhûdü’l-hâl: El-Hâc Mehmed b. Metin, Mehmed b. Şeyh Dede, İbrahim b. Mehmed Dede, Hacı Mehmed b. Saçlı, Mustafa Çelebi.