İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 580 Hüküm no: 758 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın karısı Emine bt. Hüseyin’e nafaka takdiri Nafaka Mahmiye-i İstanbul’da Ekmekçi mahallesinde sâkine hâmiletü’l-kitâb Emine bt. Hüseyin nâm hâtun meclis-i şer‘-i hatîrde takrîr-i kelâm edip zevcim gāib ani’l-meclis Mustafa b. Abdullah nâm kimesne âhar diyâra gitdikde nafaka ve kisvem için sekiz yüz akçe bırakıp, meblağ-ı mezbûru nafaka ve sâir levâzım-ı zarûriyyeme harc ve sarf edip hâlâ nafakaya şiddet-i ihtiyâcım olmağın kıbel-i şer‘den üzerine kadr-i ma‘rûf nafaka takdîr olunmak matlûbumdur dedikde mezbûre Emine gāib-i mezbûr Mustafa’nın zevcesi olduğu zâhir olup meblağ-ı mezbûrdan gayrı nafaka ve kisve makūlesinden bir akçe ve bir habbe komayıp, hâlâ nafakaya ihtiyâcı olduğuna ba‘de’t-tahlîfi’ş-şer‘î mezbûrenin nafaka ve kisve ve sâir levâzım-ı zarûriyyesi için zevci mezbûr Mustafa üzerine yevmî altı akçe nafaka farz ve takdîr olunup vakt-i zarûrette istidâne ve nafaka ve kisvesine harc ve sarfa ve lede’z-zafer zevci merkūm Mustafa’ya rücû‘a izin verilip mâ vaka‘a bi’t-taleb ketb olundu. Fi’l-yevmi’l-âşir min Saferi’l-hayr li sene erba‘a ve seb‘în ve elf. Şuhûdü’l-hâl: Hüseyin Efendi el-Brusî, Mustafa Beşe, Ali Çelebi b. Abdullah, Keşfî Mustafa Efendi, Abdi Çelebi b. Hüseyin, Şükrullah Bey b. Mustafa, Mehmed b. Ramazan, Baba Resûl b. Rıdvan.