İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 581 Hüküm no: 760 Orijinal metin no: [68a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Hafız Mehmed Efendi’nin vârislerinin, Firûz Ağa mahallesindeki arsayı Mustafa Ağa b. Halil’e sattıkları Husûs-ı âti’l-beyânın mahallinde tahrîri iltimâs olunmağın kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Kırkçeşme kurbunda Firûz Ağa mahallesinde mefharü’l-emâsil ve’l-a‘yân makbûlü’s-sudûr ve’l-erkân sâbıkan kethüdâ yeri olan işbu kitâb-ı sıhhat-nisâbın sâhibi Mustafa Ağa b. Halil’in sâkin olduğu menziline varıp zeyl-i vesîkada muharrerü’l-esâmî olan müslimîn mahzarlarında akd-i meclis-i şer‘-i şerîf eyledikde vilâyet-i Anadolu’da Taşköprü kasabasında sâkine iken bundan akdem vefât eden Fâtıma Hâtun bt. Hâfız Mehmed Efendi’nin verâseti, vâlidesi Hatîce bt. Ahmed ile li üm er karındaşı Lütfullah’a münhasıra olup kable’l-kısme mezbûre Hatîce dahi vefât edip verâseti zevc-i metrûkü Mehmed Efendi b. Hüseyin ile sadrî kebîr oğulları mezbûr Lütfullah’a ve Hüseyin’e münhasıra olup tashîh-i mes’eleleri on iki sehimden olup sihâm-ı mezbûreden iki sehim merkūm Hacı Mehmed Efendi’ye ve yedi sehim mesfûr Lütfullah’a ve üç sehim mezbûr Hüseyin’e isâbet ve intikāl eylediği şer‘an zâhir ve müte‘ayyin oldukdan sonra merkūmun Hacı Mehmed Efendi ve Lütfullah ve Hüseyin meclis-i ma‘kūd-ı mezbûrda, müşârün-ileyh Mustafa Ağa mahzarında her biri tav‘an ikrâr ve takrîr-i kelâm edip müteveffât-ı evvel mezbûre Fâtıma Hâtun’un terekesinden olup mahmiye-i mezbûrede zikr olunan Kırkçeşme kurbunda Sekbanbaşı İbrahim Ağa mahallesinde vâki‘ iki tarafı Mehmed Odabaşı mülkü ve bir tarafı tarîk-i hâs ve bir tarafı tarîk-i âm ile mahdûd muhterik menzil arsasından mezbûr Lütfullah bâlâda ta‘yîn olunduğu üzre yedi sehim hisse-i şâyi‘asını iki yüz on dokuz guruş ve bir rub‘ guruş ile on akçeye ve merkūm Hüseyin üç sehim hisse-i şâyi‘asını doksan dört guruşa ve mesfûr Hacı Mehmed iki sehim hisse-i şâyi‘asını altmış iki buçuk guruş ile yirmi akçeye, cem‘an üç yüz yetmiş altı esedî guruş ile meclis-i akidde muzayya‘a ve adedi nâ-ma‘lûm bir kabza fülûsa arsa-i mezbûreyi merkūm Mustafa Ağa’ya bâtten bey‘ ve teslîm edip ol dahi iştirâ ve kabûl ve kabz ve tesellüm eyledikden sonra semeni olan meblağ-ı mesfûr üç yüz yetmiş altı esedî guruş ile bir kabza fülûs muzayya‘ayı müşârün-ileyh Mustafa Ağa yedinden tamâmen ahz u kabz eyledik ba‘de’l-yevm zikr olunan muhterik menzil arsası müşârün-ileyh Mustafa Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr ve ba‘dehû ma‘an irsâl olunan Abdullah Çelebi ve Ahmed b. Abdülcebbar ile meclis-i şer‘-i hatîre gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene erba‘a ve seb‘în ve elf. Şuhûdü’l-hâl: Receb Efendi b. Ahmed el-İmâm, Abdullah Çelebi b. Receb Efendi, Mustafa Beşe b. Osman, Ahmed Odabaşı b. Mustafa, Ali Çelebi b. İlyas, Mehmed Çelebi b. Mehmed, Halil Çelebi b. İlyas, Mehmed Çelebi b. Ali, Osman Çelebi b. Ahmed Efendi, Mehmed Çelebi b. Abdi Beşe, Hacı Bâli b. Veli. El-emrü hasbemâ harrere fîhi harrerehu efkarü’l-verâ ileyhi Sübhânehû ve te‘âlâ Hamîd b. Mustafa el-muhâsib bi medîne-i Kostantıniyye el-mahmiyye -gufire lehümâ-.