İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 583 Hüküm no: 761 Orijinal metin no: [68a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa vakfının önceki mütevellîsi Hacı Ebubekir’in vakfa borcu olmadığı Mahmiye-i İstanbul’da Divâne Ali mahallesinde vâki‘ merhûm Hasan Ağa vakfına bi’l-fi‘l mütevellî olan Hasan Efendi b. ( ) nâm kimesne meclis-i şer‘-i hatîrde vakf-ı mezbûra bundan akdem mütevellî olan işbu râfi‘ü’l-vesîka Hacı Ebûbekir b. Receb nâm kimesne mahzarında üzerine bi’t-tevliyye da‘vâ ve takrîr-i kelâm edip bundan akdem mezbûr Hacı Ebûbekir vakf-ı mezbûra mütevellî oldukda, asl-ı mal vakf-ı mezbûrdan yedi yüz yirmi sekiz riyâlî guruşu kabz eyledikden sonra mezbûr el-Hâc Ebûbekir tevliyyet-i merkūmeden azl ve tevliyyet-i merkūme Mehmed Efendi b. Hüseyin nâm kimesneye tevcîh olundukda ol dahi zabt edip lâkin meblağ-ı mezbûru merkūm el-Hâc Ebûbekir’den vakıf için almadan fevt olup hâlâ tevliyyet-i merkūme bana tevcîh olunmak ile hâlâ ben meblağ-ı mezbûr yedi yüz yirmi sekiz riyâlî guruşu vakıf için tevliyyetim hasebiyle mezbûr Hacı Ebûbekir’den taleb ederim suâl olunsun dedikde gıbbe’s-suâl mezbûr Hacı Ebûbekir cevâbında fi’l-vâki‘ mukaddemâ ben vakf-ı mezbûra mütevellî olup mâl-ı vakf-ı mezbûrdan meblağ-ı mezbûru kabz eylediğimden sonra tevliyyet-i merkūme benim üzerimden müteveffâ-yı mezbûr Mehmed Efendi’ye tevcîh olundukda meblağ-ı mezbûr yedi yüz yirmi sekiz riyâlî guruşu der-kîse ve mâ‘adâ olan beş yüz yirmi sekiz riyâlî guruşu dahi zimem-i nâsda olmağın târih-i kitâbdan iki sene mukaddem ben der-kîse olan meblağ-ı mezbûr iki yüz guruşu nakid ve mâ‘adâ olan beş yüz yirmi sekiz riyâlî guruşun dahi rihânını hayâtında mezbûr Mehmed Efendi’ye teslîm ve zimem ashâbını dahi mahallinden gösterdiğimde, ol dahi der-kîse olan meblağ-ı mezbûru yedimden ahz u kabz ve zimemi olan beş yüz yirmi sekiz riyâlî guruşu dahi mahallinden kabûl ve rihânını kabz ve teslîm eylemiş idi. Ol vechile mâl-ı vakf-ı mezbûrdan zimmetimde bir akçe ve bir habbe bâkī kalmamışdır deyû def‘le mukābele edicek gıbbe’l-istintâk [68b] ve’l-inkâr mezbûr el-Hâc Ebûbekir’den def‘-i mezbûrunu mübeyyine beyyine taleb olundukda udûl-i müslimînden olup mahmiye-i mezbûrede Kuyumcu Bahşâyiş mahallesinde sâkin Mehmed Odabaşı b. Mirza ve Akseki mahallesinde sâkin Mehmed b. Hüseyin ve Keçeciler mahallesinde sâkin Şükrullah Odabaşı ve Ahmed b. Ramazan ve Kâtib Kasım mahallesinde sâkin İbrahim Çelebi b. Ali ve Ali Çelebi b. Mehmed ve Ali Efendi b. İbrahim ve Arslan Çelebi b. Mustafa nâm kimesneler li ecli’ş-şehâde meclis-i şer‘a hâzırûn olup istişhâd olunduklarında, fi’l-hakīka mezbûr Hacı Ebûbekir bundan akdem vakf-ı mezbûra mütevellî olup ba‘dehû tevliyyet-i mezbûre müteveffâ-yı mezbûr Mehmed Efendi’ye tevcîh olundukda mezbûr Hacı Ebûbekir mâl-ı vakf-ı mezbûrdan makbûzu olan yedi yüz yirmi sekiz riyâlî guruşun iki yüz guruşu der-kîse ve beş yüz yirmi sekiz riyâlî guruşu dahi zimem-i nâsda olmağın der-kîse olan iki yüz guruşu nakid ve zimemde olan beş yüz yirmi sekiz riyâlî guruşu dahi mahallinden gösterip rihânını târih-i kitâbdan iki sene mukaddem bizim huzûrumuzda hayâtında mezbûr Mehmed Efendi’ye teslîm ol dahi vakıf için kabûl ve kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde isri ri‘âyeti şerâiti’l-kabûl şehâdetleri makbûle oldukdan sonra müteveffâ-yı mezbûr Mehmed Efendi’nin sulbî kebîr oğlu olup meclis-i şer‘a hâzır olan İbrahim Efendi nâm kimesne dahi vech-i muharrer üzre babası müteveffâ-yı mezbûrun sıhhatinde târih-i mezbûrda mezbûr el-Hâc Ebûbekir’den mâl-ı vakf-ı mezbûrdan der-kîse iki yüz riyâlî guruşu kabz ve mâ‘adâ mâl-ı vakf-ı mezbûrun beş yüz yirmi sekiz riyâlî guruşun dahi rihânını kabz ve zimem ashâbını mahallinden kabûl eylediğini tav‘an ikrâr ve i‘tirâf etmeğin mûcebi ile mütevellî-i mezbûr Hasan Efendi merkūm Hacı Ebûbekir’e bî-vech mu‘ârazadan men birle mâ vaka‘a bi’t-taleb ketb olundu. Fî evâhiri Saferi’l-muzaffer li sene 1074. Şuhûdü’l-hâl: Ebûbekir Çelebi b. Şeyh Ali Efendi, Mehmed Çelebi b. Ali, Musa Çelebi el-câbi, Mehmed Efendi b. Mahmud kâtib-i muhâsebe, İsmail Çelebi b. Murad, Mustafa b. Hasan, Receb b. Murad.