İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 699 Hüküm no: 941 Orijinal metin no: [90a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Mosi’nin Andriye v. Yani’ye rehinli olan gemi ve sandal ile aletlerini İstati Reis v. Dimitri’den satın aldığı <> Cezîre-i Sakız’da sâkin mellâh Andriye v. Yani nâm zimmî meclis-i şer‘-i hatîr ve lâzımü’t-tevkīrde mahmiye-i İstanbul’da Sinyora cemâ‘atinden işbu râfi‘ü’l-kitâb Yasef v. Mosi nâm yahudi muvâcehesinde ikrâr ve i‘tirâf edip mezkûr Yasef gāib ani’l-meclis İstati Reis v. Dimitri nâm zimmîden bin üç yüz kırk esedî guruş semen-i makbûza iştirâ ve kabz eylediği yirmi sekiz zirâ‘ şayka ta‘bîr olunur sefîne ve on altı oturak bir sandal ve sâir âlât-ı lâzımesiyle gāib-i mezbûr İstati Reis zimmetinde cihet-i karzdan hakkım olan iki yüz seksen dört esedî guruş mukābelesinde târih-i kitâbdan on bir ay mukaddem bana rehin vaz‘ ve teslîm edip yedimde rehin iken bana bey‘ eylemiş deyû mezbûr Yasef üzerine da‘vâ eylemişdim hâlâ da‘vâ-yı mezkûremden fâriğ olup min ba‘d zikr olunan şayka ve sandal ve âlât-ı lâzıme-i ma‘lûmesine müte‘allika olan cemî‘ de‘âvî ve mütâlebât ve eymân ve muhâsamâtdan mezbûr Yasef’i ibrâ eyledim min ba‘d sâlifü’z-zikr sefîne ve sandal ve âlât-ı mezkûre Yasef’in mülk-i müşterâsı ve hakk-ı sırfiyyesidir vechen mine’l-vücûh ve sebebin mine’l-esbâb benim için hak ve alâka ve medhal yoktur dedikde mezbûr Yasef ben dahi mezkûr mellâh Andriye sâlifü’z-zikr sefîneyi mezbûr İstati’den iştirâ eylediğim hînde derk-i sefîne-i mezbûreye zâmin ve kefîl olmuş idi deyû da‘vâ etmişdim hâlâ mezbûr mellâh Andriye’yi ol kefâletden ihrâc eyledim min ba‘d husûs-ı mezbûra ve sâire müte‘allika olan cemî‘ de‘âvîden mezbûr mellâh Andriye’yi ibrâ eyledim, kıbelinde benim için hak ve alâka kalmadı dedikde gıbbe’t-tesâdukı’ş-şer‘î cezîre-i mezbûre sükkânından olup mellâh Andriye’nin yoldaşlarından İstefan v. Şivari ve Gözeli v. Sanabil ve Dimanika v. Sani ve Sani v. Andon ve Corco v. Denika nâm zimmîler meclis-i şer‘-i şerîfde mezbûr Yasef mahzarında her biri ikrâr edip sâlifü’z-zikr sefîne ve sandal ve sâir âlât-ı lâzıme-i mezkûr Yasef’in mülk-i müşterâsı ve hakk-ı sırfiyye[si]dir bizim için vechen mine’l-vücûh ve sebebin mine’l-esbâb hak ve alâkamız yoktur dedikde mâ hüve’l-vâki‘ gıbbe’t-tasdîki’ş-şer‘î ketb olundu. Fi’l-yevmi’s-sâdis ve’l-ışrîn min Rebî‘ilevvel li sene erba‘a ve seb‘în ve elf. Şuhûdü’l-hâl: Mehmed Çavuş b. Hasan, Ahmed Beşe b. Abdülkerim, Mustafa Çavuş b. Yahya, el-Hâc Ahmed b. Mahmud, Abdurrahman b. Hüseyin ve gayruhüm.