İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 701 Hüküm no: 943 Orijinal metin no: [90a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine bt. Receb’in evini Ayşe bt. Ramazan’a sattığı Mahmiye-i İstanbul’da Yenibahçe kurbunda Karabaş mahallesi sâkinelerinden Sâkine bt. Receb nâm hâtun meclis-i şer‘-i hatîr-i lâzımü’t-tevkīrde işbu bâ‘isetü’l-vesîka Ayşe bt. Ramazan nâm hâtun tarafından husûs-ı âti’l-beyânı tasdîke ve sâbitü’l-vekâle vekîli olan Şâhin Bey b. Abdullah mahzarında ikrâr ve takrîr-i kelâm, edip silk-i mülkümde münselik olup mahalle-i mezbûrda vâki‘ bir tarafı Altuncu Mehmed Çelebi mülkü ve bir tarafı Medîne-i Münevvere -alâ münevverihâ efdalü’s-salât ve ekmelü’t-tahiyye- vakfı ve bir tarafı tarîk-i hâs ve bir tarafı tarîk-i âma müntehî bir bâb tahtânî oda ve önünde sofa ve bir su kuyusu ve muhavvatayı müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkile-i mezbûre Ayşe Hâtun’a on iki bin beş yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr on iki bin beş yüz akçeyi müvekkile-i merkūme Ayşe Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezkûr müvekkile-i mersûme Ayşe Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’t-târihi’l-mezbûr li’s-seneti’l-mezbûre. Şuhûdü’l-hâl: Ahmed Efendi b. Ali el-İmâm, Mustafa b. Hüseyin, Hüseyin b. İbrahim, Hasan b. Mehmed, Veli b. Mahmud ve gayruhüm.