İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 717 Hüküm no: 962 Orijinal metin no: [93b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühânî bt. Hüseyin’in iki evini Ali Efendi b. Ömer’e sattığı Mahmiye-i İstanbul’da Murad Paşa-yı Atîk mahallesinde sâkine Ümmühânî bt. Hüseyin nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-vesîka mefharu erbâbi’t-tahrîr ve’t-ta‘allüm Ali Efendi b. Ömer mahzarında ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafdan ba‘zan bâyi‘a-i mezbûre Ümmühânî Hâtun bahçesine ve ba‘zan vakıf arsaya ve bir tarafdan ba‘zan Haffâf Pîrî Çelebi menziline ve ba‘zan kaftancı el-Hâc Ali menziline ve bir tarafdan yine mezbûre Ümmühânî Hâtun’un menziline ve bir tarafdan tarîk-i hâs ile mahdûd iki bâb menzil ki birinin tabaka-i ulyâsında iki oda ve sofa ve dehliz ve tabaka-i sâniyyesinde iki oda ve kenîf ve tahtânî bir matbah ve muhavvatayı müştemil ve menzil, ahır fevkānî bir oda ve sofa ve tahtânî bir oda ve kenîf ve muhavvatayı müştemil iki menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Ali Efendi’ye yetmiş bin nakid ve râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr yetmiş bin akçeyi merkūm Ali Efendi yedinden tamâmen ahz u kabz eyledim ba‘de’l-yevm hudûd-ı mezbûre ile mahdûd olan iki menzil merkūm Ali Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūme. Şuhûdü’l-hâl: Es-Sâbikūn.