İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 718 Hüküm no: 964 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İznik serdârı Ali Çelebi b. Mustafa’nın yeniçeri çavuşu Mehmed Çavuş b. Mehmed ile sulh olduğu Vilâyet-i Anadolu’da kasaba-i İznik serdârı olan fahrü’l-akrân Ali Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde Dergâh-ı Âlî -dâme merci‘an li’l-e‘âlî- yeniçeri çavuşlarından fahrü’l-emsâl Mehmed Çavuş b. Mehmed nâm kimesne mahzarında ikrâr ve takrîr-i kelâm edip merkūm Mehmed Çavuş târih-i kitâbdan üç ay mukaddem kasaba-i merkūmeye uğrayıp beni bi gayri vechin ahz edip bir kır bârgirim ile yüz kıt‘a esedî guruşumu bi gayri vechin ahz u kabz eylemiş idi deyû bundan akdem mezbûrdan da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî vesâtat-ı muslihîn ile merkūm Mehmed Çavuş zikr olunan kır bârgirimi meclis-i şer‘de bana red ve teslîm ben dahi yedinden ahz u kabz edip mâ‘adâ yüz esedî guruş da‘vâsından merkūm Mehmed Çavuş’un zimmetini ibrâ-i âmm-ı kātı‘ü’n li’n-nizâ‘la ibrâ ve iskāt eyledim dedikde gıbbe’t-tasdîki’l-mu‘teber, mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn [min] şehri Rebî‘ilevvel li sene erba‘a ve seb‘în ve elf. Şuhûdü’l-hâl: Ahmed Çelebi b. Mahmud, Abdi Çelebi b. Hüseyin, Abdülbâkī Beşe el-Mübâşir, Baba Resûl b. Rıdvan, Mehmed Çelebi b. Abdullah ve gayruhüm.