İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 719 Hüküm no: 965 Orijinal metin no: [94a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Litaro bt. Trandafilo’nun evini kızı Malamatanya bt. Dimitri’ye sattığı Mahmiye-i İstanbul hısnı ebvâbından Eğrikapı kurbunda vâki‘ Avcıbey mahallesi sâkinelerinden Litaro bt. Trandafilo nâm nasrâniyye meclis-i şer‘-i hatîr-i lâzımü’t-tevkīrde sadriyye kızı işbu râfi‘atü’l-kitâb Malamatanya bt. Dimitri nâm nasrâniyye muvâcehesinde ikrâr ve takrîr-i kelâm edip silk-i mülk-i sahîhimde münselik olup mahalle-i merkūmede vâki‘ bir tarafı merhûm Mesih Paşa vakfı ve bir tarafı Katakozni bt. Dimitri mülkü ve bir tarafı cidâr-ı hısn ve bir tarafı tarîk-i âm ile mahdûd mülk menzili bi cümleti’t-tevâbi‘ ve’l-levâhık ve kâffeti’l-hukūk ve’l-merâfık merkūme kızım Malamatanya’ya elli kıt‘a riyâlî guruşa bey‘ ve teslîm ol dahi iştirâ ve kabûl eyledikden sonra semeni olan meblağ-ı merkūm elli guruşu bi’t-tamâm yedinden alıp kabz eyledim ba‘de’l-yevm menzil-i mezbûr, merkūme Malamatanya’nın mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fî gurreti Rebî‘ilâhir sene 1074. Şuhûdü’l-hâl: Davud Efendi b. Mehmed, Mehmed b. Veli, Mustafa b. İsmail, Abdi Çelebi b. Hüseyin, Mehmed Çelebi b. Abdullah, pazarcı Todori [v.] Yorgi, Andon v. İstemad.