İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 720 Hüküm no: 966 Orijinal metin no: [94a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malamatanya bt. Dimitri’nin evini Ali Ağa vakfına bey‘ bi’l-istiğlâl yoluyla sattığı Mahrûse-i Kostantıniyye hısnı ebvâbından Eğrikapı kurbunda Avcıbey mahallesi sâkinelerinden Malamatanya bt. Dimitri nâm nasrâniyye meclis-i şer‘-i hatîr-i lâzımü’t-tevkīrde medîne-i Ebâ Eyyûb-i Ensârî -radiyallâhu anhü’l-Bârî- mahallâtından merhûm Zal Mahmud Paşa mahallesi kurbunda merhûm Ali Ağa vakfına bi’l-fi‘l mütevellî olan Davud Efendi b. Mehmed mahzarında ikrâr ve takrîr-i kelâm, edip silk-i mülk-i sahîhimde münselik olup sâlifü’z-zikr Avcıbey mahallesinde vâki‘ bir tarafı merhûm Mesih Paşa vakfı ve bir tarafı Katokuzeni bt. Dimitri mülkü ve bir tarafı cidâr-ı hısn ve bir tarafı tarîk-i âm ile mahdûd menzili mütevellî-i mezbûra bi tarîki’l-istiğlâl elli kıt‘a riyâlî guruşa bey‘ ve teslîm edip ol dahi mâl-ı vakf-ı mezbûr ile iştirâ ve kabûl ve kabz edip semeni olan meblağ-ı merkūm elli riyâlî guruşu yedinden alıp kabz eyledikden sonra menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin dört yüz kırk akçeye mütevellî-i merkūm Davud Efendi bana îcâr ve teslîm ben dahi istîcâr ve tesellüm eyledim dedikde gıbbe’t-tesâdukı’l-vicâhî, mâ [vaka‘a] bi’t-taleb ketb olundu. Şuhûdü’l-hâl: Es-Sâbikūn.