İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 721 Hüküm no: 968 Orijinal metin no: [94a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Hüseyin’in evini Ovanes v. Tovac’a sattığı Sâbıkan seksen birinci cemâ‘atin odabaşısı olup Hoca Üveys mahallesi sâkinlerinden Mustafa Ağa b. Hüseyin meclis-i şer‘-i hatîrde işbu bâ‘isü’l-kitâb Ovanes v. Tovac nâm Ermeni mahzarında ikrâr ve takrîr-i kelâm edip silk-i mülk-i sahîhimde münselik olup mahmiye-i İstanbul’da Ohri mahallesinde vâki‘ iki tarafı Solakzâde İbrahim Çelebi mülküne ve bir tarafı Agop Papas mülküne ve bir tarafı tarîk-i âma müntehî fevkānî üç oda ve bir mahzen ve bi’r-i mâyı ve cüneyne ve kenîfi müştemil mülk menzilimi, merkūm Ovanes’e yedi yüz elli esedî guruşa bâtten bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûr yedi yüz elli esedî guruşu bi’t-tamâm merkūm Ovanes yedinden alıp kabz eyledim ba‘de’l-yevm menzil-i merkūm cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Ovanes’in mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîk, mâ vaka‘a bi’t-taleb ketb olundu. Hurrire [fî] şehri Rebî‘ilâhir sene 1074. Şuhûdü’l-hâl: Ahmed Ağa el-Cündî, İbrahim Hoca-i Sultânî, Kadızâde Mehmed Efendi, müezzin İbrahim Efendi, Mehmed Efendi el-İmâm, Mustafa b. Receb, Ömer Bey b. Mustafa, Mehmed b. Mahmud, Müezzin Mehmed Halîfe el-Müezzin, Mustafa Efendi el-İmâm ve gayruhüm.