İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 721 Hüküm no: 969 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Şaban b. el-Hâc İsmail’in habbâz Karabet v. Haçuk’daki alacağı İşbu râfi‘ü’l-kitâb el-Hâc Şaban b. el-Hâc İsmail mahfil-i kazâda habbâz tâifesinden Karabet v. Haçuk nâm Ermeni mahzarında üzerine da‘vâ ve takrîr-i kelâm edip mezkûr Karabet zimmetinde cihet-i karz-ı şer‘iyyeden kırk bin akçe hakkım olup hattâ meblağ-ı mezbûr kırk bin akçe bana deyni olduğunu alâ re’si’l-işhâd ikrâr eylemiş iken, meblağ-ı mezbûru bana edâ ve teslîme mezbûr Karabet ta‘annüd eder, suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i İstanbul’da Ali Paşa-yı Atîk mahallesi ahâlîsinden Mustafa Efendi b. Durak el-imâm ve Mehmed Ağa b. Mehmed ve Hasan Halîfe b. Ahmed el-Müezzin ve Şaban Efendi b. Hüseyin ve İbrahim b. Sinan nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezkûr Karabet müdde‘î-i mezkûr el-Hâc Şaban’a cihet-i karz-ı şer‘îden kırk bin akçe zimmetimde lâzımü’l-edâ ve vâcibü’l-kazâ deynim vardır deyû bizim huzûrumuzda ikrâr ve işhâd edip müdde‘î-i mezbûr tasdîk eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebince ba‘de’l-hükm mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Süleyman Çelebi b. Ahmed, el-Hâc Ahmed b. Mahmud, Mehmed b. Muslu el-Müezzin, Mansur Çelebi b. Mansur, Kurt b. Abdullah nâzır, Nasûh Beşe Çukadar, Mehmed Çelebi b. Süleyman, Mehmed Beşe kalaycı, el-Hâc Hüseyin b. ( ).